LVV nuk pajtohet me vendimin e KQZ-së për shtyrjen e mbledhjes, qëndron në sallë

Kryetarja e Komisionit Qendror të Zgjedhjeve (KQZ), Valdete Daka, ka shtyrë për dy orë mbledhjen ku do të certifikohen kandidatët për deputetë.

Përfaqësuesit e Lëvizjes Vetëvendosje insistuan që të mos shtyhet mbledhja, teksa deklaruan se nuk do të dalin jashtë sallës.

Sami Kurteshi (LVV), tha se Daka po iu bënë presion anëtarëve të KQZ-së, transmeton Telegrafi.

“Kryetarja ka mbledhur anëtarët e KQZ-së për presion, por ne të LVV-së nuk do të jemi. Kjo ka ndodhur për herë të parë. Ne e dimë cili është problem, se tash po ndryshojnë rregullat brenda momentit, KQZ e ka për detyrë me votu të gjitha procedurat dhe veprimet që duhet të mundësojnë zgjedhjet e 14 shkurtit 2021. Ne nuk kemi arsye për t’i ikë asnjë ballafaqimi, e asnjë votimi. E as arsye për të penguar proceset zgjedhore. Ne do të jemi këtu, do të bëjmë përpjekje që ligjet të zbatohen”, tha Kurteshi derisa po vazhdon të qëndrojë në sallë.

Ndryshe, zyra për regjistrimin dhe certifikimin e partive politike i ka rekomanduar KQZ-së që certifikojë listën për deputetë, ashtu siç është. /Telegrafi/