LSDM: Gruevski dhe pushteti i tij luajnë me ardhmërinë euroatlantike të Maqedonisë

Kryetari i Komisionit për mbrojtje në LSDM, Maksim Dimitrievski akuzoi se Gruevski dhe pushteti i tij, po luajnë me ardhmërinë euroatlantike të Maqedonisë, transmeton Telegrafi Maqedoni.

Dëshmi për këtë, sipas tij, është samiti i fundit i NATO-s në Varshavë, i cili u mbajt në fillim të këtij muajit, ku Maqedonia morri paralajmërime serioze. Sipas Dimitrievskit, këtë e shpjegon mos zbatimi i Marrëveshjes së Përzhinës, si mënyra e vetme për të dalë nga kriza. Ai gjithashtu tha se si kushte të nevojshme janë krijimi i kushteve për zgjedhje të besueshme, sigurimi i sundimit të ligjit, gjykatat e pavarura dhe liria e mediave.

Tv21 përcjell reagimin e OBRM-PDUKM-së. Në kumtesën e tyre thuhet se vetëm Maksim Dimitrievski dhe LSDM-ja janë të vetmit në Maqedoni të cilët nuk mund të shohin qartë se Maqedonia nuk është anëtare e NATO-s për shkak të kundërshtimit të Greqisë, për shkak të kushteve dhe vetos së saj.

“Asgjë nuk më befason nga ky pushtet anti – BE dhe anti – NATO, i cili gjatë 10 viteve të fundit, me plotë vetëdije po e largon Maqedoninë nga proceset euroatlantike dhe përmes institucioneve të uzurpuara vendase , pa kontroll dhe lirshëm po vjedh, korrupton dhe po pasurohet në kurriz të qytetarëve”, thotë Maksim Dimitrievski, nga LSDM-ja./Telegrafi/