Limaj: Kosova ka nevojë për parti që interesin e shtetit e vendos në rend të parë

Kryetari i Nismës për Kosovën, Fatmir Limaj, në vendlindje të tij ka thënë se Kosova ka nevojë për një forcë politike siç është partia që e drejton, e që sipas tij ata dinë që interesin e ngushtë partiak ta largojnë nga rendi i parë, e ta vendosin interesin e vendit.

Limaj në Malishevë tha se Kosovës i duhet një forcë politike që ofron dhe bashkon, e jo që interesin e vetë personal e vendos në rend të parë.

I pari i Nismës për Kosovën, Fatmir Limaj, tha se në vitin 2013 e kanë nisur rrugëtimin si Nismë për të ndryshuar gjendjen në Kosovë, e që siç tha ai për të sjellë frymë demokratike, pasi që mashtrimi, shantazhi e kërcënimi sipas Limajt kishte shkuar në kulm.

Po ashtu, Limaj tha se në këto zgjedhje Nisma për Kosovën do të dal me më së paku 100 asamblistë në tërë Kosovën, ndërkohë që potencoi se janë krenar me modelin e qeverisjes që kanë bërë në Malishevë.

Limaj tha se për herë të parë në Malishevë nuk ka pasur dallime në investime, ku ai tha se i kanë shikuar të gjithë qytetarët njësoj pavarësisht bindjeve të tyre politike.

Kurse, deputeti i Nismës për Kosovën, Bilall Sherifi, tha se partia pjesë e të cilës është në qendër të programit të saj e ka zhvillimin e bujqësisë.

Ndërsa, edhe një mandat për të qeverisur me Malishevën po e kërkon kryetari aktual i kësaj komune Ragip Begaj, i cili para qytetarëve të Malishevës paraqiti projektet të cilat i ka realizuar në qeverisjen e tij katër vjeçare.

Ndërkaq premtoj se për katër vitet e ardhshme buxhetin për bujqësi do ta bëjë 5 milionë euro.

Pretendenti për Malishevën premtoi mbështetje edhe për skamnorët e kësaj komune, ku ai tha se do të ndërtoj 20 shtëpi si dhe që do të jetë pran tyre çdo herë.

Në këtë tubim elektoral Nisma për Kosovën ka paraqitur edhe kandidatët për asamblenë komunale të Malishevës.