Botë Nga Bota Azia

Liderët botërorë solidarizohen me popullin japonez pas vrasjes së ish-kryeministrit, Shinzo Abe

Para 3 vitesh

Shumë liderë botërorë po solidarizohen pas vdekjes së ish-kryeministrit Shinzo Abe.

Ky i fundit u vra sot gjatë kohës sa ishte duke mbajtur një fjalim me rastin e fushatës elektorale në qytetin Nara.

Politikani 68-vjeçar nuk i mbijetoi sulmit me armë të cilën e kreu një41-vjeçar, ish-marins japonez.

Presidenti i Koresë së Jugut, Yoon Suk-yeol shprehu ngushëllimet e tij për Japoninë, duke e përshkruar vrasjen e Abe si një “akt krimi të pafalshëm”.

Kancelari gjerman, Olaf Scholz tha se ishte “thellësisht i pikëlluar dhe i habitur”, duke shtuar se Gjermania “do të qëndrojë afër Japonisë në këto orë të vështira”, raporton cnn.

Presidenti i SHBA-së, Joe Biden tha se ishte “i shtangur, i indinjuar dhe thellësisht i pikëlluar” nga vdekja e ish-kryeministrit japonez Shinzo Abe. “Mbi të gjitha, [Abe] u kujdes shumë për popullin japonez dhe ia kushtoi jetën duke shërbyer për të. Edhe në momentin që u sulmua, ai ishte i angazhuar në punën e demokracisë”, shkroi Biden në një deklaratë.

The assassination of @AbeShinzo leaves me shocked and deeply saddened. My deepest sympathy goes to his family, my colleague Fumio @kishida230 and our Japanese friends. We stand closely by Japan's side in these difficult hours.

— Bundeskanzler Olaf Scholz (@Bundeskanzler) July 8, 2022

Presidenti i Francës, Emmanuel Macron ka shkruar në rrjetet sociale “në emër të popullit francez, i dërgoj ngushëllimet e mia autoriteteve dhe popullit japonez pas vrasjes së Shinzo Abe. Japonia po humbet një kryeministër të madh, i cili ia kushtoi jetën vendit të tij dhe punoi për të sjellë ekuilibër në botë”.

Presidenti turk, Recep Tayyip Erdogan e quajti Abe një “mik të dashur”, duke shtuar se “I dënoj ata që kryen këtë sulm të tmerrshëm”.

Kryeministri i Indisë, Narendra Modi tha se ishte “i tronditur dhe i pikëlluar për vdekjen tragjike të një prej miqve të mi më të dashur, Shinzo Abe”.

“Udhëheqja e tij globale në kohë të panjohura do të mbahet mend nga shumë njerëz”, pohoi kryeministri britanik, Boris Johnson.

Kryeministri australian, Anthony Albanese tha se Abe kishte qenë një “mik dhe aleat i madh i Australisë”, raporton bbc.

Shocked and saddened by the tragic death of former Japanese PM Abe Shinzo. He was a great friend and ally to Australia. Deepest sympathies to his family and the people of Japan. We mourn with you. pic.twitter.com/ms9Va9OPN4

— Anthony Albanese (@AlboMP) July 8, 2022

Presidentja e Komisionit Evropian, Ursula von der Leyen e quajti Abe “një person të mrekullueshëm”, duke shtuar se “Kjo vrasje brutale dhe frikacake e Shinzo Abe trondit të gjithë botën”.

Sekretari i Përgjithshëm i NATO-s, Jens Stoltenberg i dërgoi “ngushëllimet më të thella” familjes së ish-kryeministrit të vrarë japonez Shinzo Abe dhe popullit të Japonisë.

“Thellësisht i pikëlluar nga vrasja e tmerrshme e Shinzo Abe, një mbrojtës i demokracisë dhe mikut dhe kolegut tim gjatë shumë viteve”, shkroi Stoltenberg.

Kryeministri italian, Mario Draghi tha se ishte “i tronditur nga ky sulm i tmerrshëm” dhe e përshkroi Abe si “një protagonist të madh të jetës politike japoneze dhe ndërkombëtare në dekadat e fundit, falë shpirtit të tij inovativ dhe vizionit reformues”.

Dhe kryeministri izraelit, Yair Lapid tha se ai ishte “një udhëheqës i dalluar”.

Theksojmë se popullin japonez janë solidarizuar edhe liderët e Kosovës, Shqipërisë dhe rajonit.

Ndryshe, Abe nuk mundi t’i mbijetonte plagëve të marra pas të shtënave me armë në drejtim të tij gjatë kohës sa ishte duke mbajtur një fjalim elektoral në qytetin Nara. /Telegrafi/