Letra e Lazim Destanit pas shpalljes së Shkëndijës kampion

Shkëndija të dielën pranoi trofeun për titullin e kampionit të Maqedonisë së Veriut në sezonin 2018/2019, ndërsa pas festës, Lazim Destani me një letër të hapur ka uruar gjithë ata që ndjejnë veten të afërt me skuadrën kuqezi.

Më poshtë është letra e plotë e kreut të klubit tetovar:

E nderuara familje e madhe kuqezi, të nderuar lojtarë të KF Shkëndija, trajnerë, staf i administratës, gjithë ju që jeni pjesë e klubit dhe ju të nderuar spektatorë të skuadrës sonë të përbashkët.

Jam i gëzuar që ne të gjithë së bashku vazhdojmë të shënojmë momente të reja suksesi me skuadrën tonë të dashur, me Shkëndijën. Në mënyrë të veçantë më gëzon titulli i ri i kuqezinjve tanë, kampion shtetëror, duke manifestuar edhe në këtë stinor dominim në elitën e futbollit në vendin tonë.

Jemi krenarë që hap pas hapi po arrijmë që premtimet t’i kthejmë në vepra dhe uroj e besoj që të gjithë së bashku do të vazhdojmë të ecim përpara me këtë rritëm zhvillimi.

Lexo po ashtu Të gjitha lajmet nga KF Shkëndija

Çdo titull i fituar e ka shijen e vet, ndërsa e veçanta e sivjetme është se Shkëndija po e prek një tjetër moment historik, pra për herë të parë sivjet Shkëndija e mbrojti titullin e kampionit.

Katër trofe brenda tre viteve është arritje historike për Shkëndijën dhe duke i ditur ambiciet tona të përbashkëta, këto suksese na inkurajojnë të punojmë me përkushtim akoma më të madh drejt sfidave të reja që i kemi në rrugën e ecjes sonë përpara.

Jam i bindur se Shkëndija do të vazhdojë punën me dedikim për ta dominuar skenën e futbollit në vend. Por, në të njëjtën kohë, ne duam ta bëjmë edhe hapin tjetër të radhës në Kupat e Evropës. Tashmë tre vitet e fundit Shkëndija po arrin ‘play-offin’ në garën e Europa League, ndërsa uroj që sivjet ta kalojmë këtë prag e ta shijojmë bukurinë e hyrjes në grupe. Besoj se tash para vetes kemi një verë tjetër përplot me emocione e kënaqësi që do të na sjellin paraqitjet e Shkëndijës në Evropë. Uroj me kuqezinjtë të shijojmë sa më shumë suksese e gëzime.

Duke ju falënderuar ju mbështetësve të Shkëndijës që gjithmonë i qëndroni pranë skuadrës suaj të zemrës, dhe në veçanti tifogrupin e Ballistëve, – ju ftoj të qëndrojmë të bashkuar në rrugën e Shkëndijës kuqezi drejt sukseseve të reja.