Lekaj tregon çka deshi Vetëvendosje: “Alternativë për Kosovën” me Kurtin në krye, ne s’e pranuam

Pal Lekaj, tash shef i deputetëve të AAK-së pas dorëheqjes së Donika Kadaj Bujupi nga partia, ka thënë se ata do të vazhdojnë të mbesin jashtë Kuvendit të Kosovës.

Lekaj ka thënë se këtë vendim e kanë marrë pasi që kanë konsideruar se janë shterur të gjitha veprimet, që ai i ka quajtur më radikale nga ana e deputetëve të saj. Këtë vendim, ka thënë Lekaj, AAK-ja e ka marrë në struktura të partisë dhe pa sugjerim të dikujt nga jashtë.

“Kjo Qeveri e ka humbur kuptimin. Ne do të vazhdojmë me protesta në shesh dhe këtë duhet ta marrë seriozisht Qeveria. Nëse mendojnë se e kemi nisur kundërshtimin tonë vetëm për të na joshur me pushtet e kanë pasur gabim, sepse ne e kemi bërë këtë sepse kemi konsideruar se marrëveshjet e cenojnë vendin dhe territorin”, ka thënë Lekaj, në Interaktiv të KTV-së.

Lekaj ka thënë se AAK-në me Vetëvendosjen e ka bashkuar kauza e luftimit të të keqes dhe jo lufta për pushtet.

“Ka qenë opozita më e fortë ndonjëherë. Kjo nuk duhet të na ndajë në opozitarizmin dhe bashkë ta ndalim të keqen që vjen nga këto dy marrëveshje tashmë të njohura për opinionin”, ka thënë Lekaj, përcjell koha.net.

Shefi i deputetëve të AAK-së ka thënë se fillimisht Vetëvendosje dhe Nisma ishin pajtuar që mes atyre të parave të ketë shpërndarje të barabartë të kandidatëve në listë, por ka treguar se pse u ndanë.

“Vetëvendosje i donte të dyja, edhe bartësin e listës edhe të nominuarin për kryeministër. Ne thoshim se nëse Vetëvendosje merr bartësin e listës, kandidat për kryeministër dhe i dyti në listë të jetë Ramush Haradinaj”, ka thënë Lekaj.

“Vetëvendosje donte që të krijohej lista me emrin ‘Alternativa për Kosovën’ dhe donin që Albin Kurti të jetë në krye të saj. Ne nuk pranonim këtë, sepse e konsideronim si shkrirje të AAK-së”, ka thënë Lekaj.