LDK kundër shtyrjes së zgjedhjeve, pajtohet për pesë ose asnjë ditë fushatë

Nënkryetari i Lidhjes Demokratike të Kosovës, Lutfi Haziri pas mbledhjes së kryesisë së kësaj partie, tha se LDK është kundër shtyrjes se zgjedhjeve lokale të 17 tetorit.

Haziri tha se si parti ftojnë partitë tjera politike në vend të krijojnë konsensus që fushata zgjedhore ose të shkurtohet në 5 ditë ose të mos mbahet fare.

Derisa shprehet kundër shtyrjes se zgjedhjeve lokale, Haziri thotë se nëse ndodhë kjo do bëhet një precedent.

“Ne kemi propozuar më herët dhe jemi të gatshëm që fushatën më e shkurtër pesë ditë të vetme dhe ftojmë partitë politike të krijojnë një kulturë konsensusi nëse është e nevojshme ta ulim në pikën zero. Presim që 17 tetori të jetë ditë e bardhë, ku qytetarët të kenë mundësi të votojnë duke respektuar masat pandemike dhe masat e IKSHP-së në mënyrë që me larguar nga logjika precedentin e shtyrjes së zgjedhjeve, kjo nuk bënë me u lejuar me u thy Kushtetuta. Nuk ka autoritet në Kosovë që zgjedhjet në Kosovës mund t’i shtyj”, tha ai.

Haziri tha se nëse vendoset për shtyrjen e zgjedhjeve lokale, do përdorin çdo formë kushtetuese për ta kundërshtuar atë vendim.

Ndërsa, presidentja e Kosovës, Vjosa Osmani në orën 17:00 do pres në takim partitë politike për të diskutuar opinionin dhe rekomandimin e IKShP-së dhe Taskë Forcës anti-Covid për ndikimin që zgjedhjet mund të kenë në situatën pandemike nëpër të cilën po kalon Kosova.