Latifi: Cilësinë e ajrit në Kosovë e monitorojmë me 11 stacione, gjatë dimrit gjendja alarmante (Video)

Letafete Latifi, drejtore e Institutit Hidrometeorologjik të Kosovës (IHK) në një intervistë për Telegrafin me gazetarin Muhamet Hajrullahu ka bërë të ditur përveç Ambasadës amerikane cilësinë e ajrit në Kosovë e monitoron edhe IHK përmes 11 stacioneve monitoruese dhe nga këto vërehet se gjatë sezonit të dimrit ka ditë kur gjendja është alarmante dhe tejkalimet janë të larta.

Latifi në këtë intervistë për Telegrafin theksoi se duke pasur parasysh që gjatë sezonit të dimrit ka ditë kur gjendja është alarmante dhe tejkalimet janë të larta, Instituti i shëndetit publik del me rekomandime për qytetarët.

Ajo shpjegoi pse gjatë sezonit të dimrit ka përkeqësim të cilësisë së ajrit. “…Duke ndërlidhur këta faktor, kushtet atmosferike dhe emisionet që shkaktohen nga ndotësit, djegia e lëndëve për ngrohje, transporti, industria, gjendja e cilësisë së ajrit përkeqësohet”, tha ajo.

Sipas saj, shifrat e Ambasadës amerikane me ato të IHK-së nuk mund të jenë identike pasi varet se është vendosur stacioni monitorues.

Lexo po ashtu Rikthehet ajri i ndotur në Prishtinë

“Shifrat nuk mund jenë identike se varet se ku është vendos stacioni monitorues”, tha ajo, duke shtuar se megjithëse e kanë teknologjinë e njëjtë rezultatet mund të ndryshojnë pak për shkak të lokacionit.

Latifi bëri të ditur se në Prishtinë kanë dy matës, një në lokacionin e IHK-së në dalje të Prishtinës dhe stacioni i dytë është te ish-Rilindja.

Ndërkaq, stacioni i tretë është i Ambasadës amerikane në lagjen “Arbëria”, ku kryesisht impakti vjen nga amvisëria dhe KEK-u. /Telegrafi/