Irani sulmon dy baza ushtarake amerikane në Irak

Televizioni shtetëror i Iranit ka bërë të ditur se Garda Revolucionare Islamike e Iranit (IRGC) kanë goditur bazën ajrore amerikane të Ain al-Asad në provincën Anbar në Irakun perëndimor.

Siç shkruan CNN, përcjell Telegrafi, sulmi vjen pas një premtimi për hakmarrje ndaj SHBA-së, pas vrasjes së komandantit të lartë iranian, gjeneral-lejtnant Qassem Soleimani.

Po sipas raportimeve, dhjetëra raketa qëlluan bazën strategjike ajrore. Sulmi u konfirmua më vonë nga Shtëpia e Bardhë, thuhet në raport.

Një lajm i tillë është konfirmuar edhe nga Pentagoni që ka thënë se Irani ka lansuar raketa në drejtim të forcave ushtarake dhe të koalicionit amerikan në Irak.

Pentagoni ka thënë që Irani ka lëshuar më shumë se një duzinë raketash.

“Është e qartë se këto raketa u hodhën nga Irani dhe synuan të paktën dy baza ushtarake irakiane që strehojnë ushtarakë dhe personel të koalicionit amerikan në Al-Asad dhe Irbil”, ka thënë Jonathan Hoffman, ndihmës i Sekretarit të Mbrojtjes për Çështjet Publike, në një deklaratë.

Ndërkohë, po sipas CNN, Trupat e Gardës Revolucionare Islamike (IRGC) kanë marrë përgjegjësinë për një sulm me raketa në një bazë ajrore irakiane ku strehohen trupat amerikane.

Siç bëhet e ditur më tej, edhe presidenti amerikan, Donald Trump u informua për raportet e sulmeve me raketa në një bazë ajrore, ku trupat amerikane janë vendosur në Irak, tha zëdhënësi i tij.

“Ne jemi të vetëdijshëm për raportet e sulmeve në objektet amerikane në Irak. Presidenti është informuar dhe po monitoron nga afër situatën dhe po këshillohet me ekipin e tij të sigurisë kombëtare”, tha sekretarja e shtypit e Shtëpisë së Bardhë, Stephanie Grisham. /Telegrafi/