Laborator të drogës sintetike, policia arreston një të dyshuar në Zubin Potok

Policia e Kosovës ka njoftuar se sot në fshatin Qukic – Zubin Potok është arrestuar i dyshuari mashkull kosovar me urdhërarrest te lëshuar nga Gjykata Themelore në Mitrovicë, i cili dyshohet se ishte i përfshirë në rastin ‘Prodhimi dhe përpunimi i paautorizuar i narkotikëve ,substancave psikotrope ,analoge apo veglave ,pajisjeve apo materialeve narkotike’.

“Rasti në fjalë ka ndodhur në vitin 2018 dhe në atë kohë në shtëpinë e tij i njëjti me disa persona të tjerë, gjegjësisht si grup kriminal, dyshohet se kanë pasur të improvizuar një laborator të drogave sintetike, ku dyshohet se kanë prodhuar droga sintetike të llojit të amfetaminës”, thuhet në njoftimin e policisë.

Në lidhje me rastin, me datë 05 qershor 2018 ishin sekuestruar pajisjet për prodhimin e drogave sintetike si në vijim: 4 armë të gjata , municion, 2 motorolla, tableta rinostop, tableta rinasek , sasi e madhe e tretësit; diku 12 bure (fuqi) prej 200 litrave të cilat shërbejnë për prodhimin e drogave sintetike. Gjithashtu është sekuestruar një sasi e dyshuar e marihuanës.

“Grupi kriminal dyshohet se ka vepruar nga shtatë persona të dyshuar ku është iniciuar procedurë penale ndaj tyre, të cilët dyshohet se për një kohë kanë bërë përpunimin e drogave sintetike të llojit amfetaminë. Në lidhje me rastin të dyshuarit i caktohet ndalimi policor me vendim të lëshuar nga prokurori i shtetit”, thuhet në njoftim. /Telegrafi/