Kush po e dëmton pronën publike në Shtime? (Foto)

Rrjeti i OJQ-ve “PRO NET” në Shtime ka reaguar ndaj dëmtimeve që i janë bërë shëtitores së qytetit tek Qendra Rinore.

Ky rrjet i OJQ-ve, që reagimit të tyre i ka bashkangjitur disa fotografi, pyet ata që po e dëmtojnë pronën publike se pse po e bëjnë këtë?

“Ato nuk janë pronë e askujt, por janë pronë e jona dhe janë në shfrytëzimin tonë dhe të të gjithë qytetarëve dhe vizitorëve që do t’i kemi në Shtime e kur jemi tek vizitoret çfarë t’i themi atyre kur i shoqërojmë në këtë shëtitore ?! U dëmtuan vetë ? Jo nuk është arsye e as justifikim”, thuhet në reagimin e rrjetit të OJQ-ve “PRO NET”, transmeton Telegrafi.

Në reagim thuhet se “fotot më së miri tregojnë për dëmet që janë bërë atje, madje edhe një e metaltë e rrymës elektrike i ka penguar dikujt sa që e kanë dëmtuar dhe hapur atë duke vënë në rrezik jetën e tyre fillimisht e pastaj edhe të të rinjve që frekuentojnë atje por sot fatmirësisht kjo kuti ishte mbyllur një formë që rrezikon sërish të hapet”.

Duke apeluar mos ta dëmtojmë qytetin, parqet, natyrën …, “PRO NET” shpreson që këto veprime të jenë të fundit dhe tani e tutje bashkë të kujdesen për ambientin. /Telegrafi/