Kurti thotë se vizita e tij në SHBA po përgatitet që të bëhet në fillim të vitit të ardhshëm

Kryeministri i Kosovës, Albin Kurti ka folur për vizitën e tij të paralajmëruar në SHBA gjatë muajit nëntor, vizitë kjo e cila nuk ndodhi.

Kurti në një konferencë për media, tha sot se vizita e tij në Shtetet e Bashkuara të Amerikës është duke u përgatitur që të zhvillohet në fillim të vitit 2022.

Ai tha se nuk do të njoftojnë për takime të veçanta pa u bërë programi i plotë i vizitës.

Lexo po ashtu Shtyhet vizita e paralajmëruar e Kurtit në SHBA

“Shefi i stafit të kryeministrit, z.Luan Dalipi është duke e përgatitur vizitën time në SHBA në fillim të vitit të ardhshëm, mirëpo ne nuk do të njoftojmë për takime të veçanta pa u bërë programi i plotë”, tha Kurti.

Ai shtoi se është diskutuar mundësia e një takimi të mundshëm në javën e dytë të dhjetorit në Bruksel me presidentin e Serbisë, dhe nuk kam informacione se ka kushtëzime nga ndokush.

“Vlerësimi se a duhet të mbahet një takim i tillë i takon, Përfaqësuesit të Lartë të BE-së për Politikë të Jashtme Josep Borrell dhe emisarit Lajçak. Janë ata të cilët e vlerësojnë nëse do të na i dërgojnë ftesat apo jo”, tha Kurti. /Telegrafi/