Kurti në takim me kancelarin austriak, diskutojnë për investimet dhe rritjen e bashkëpunimit ekonomik

Pas samitit të gjashtë shteteve të Ballkanit Perëndimor, në Vjenë, Krye​ministri i Republikës së Kosovës, Albin Kurti, është pritur në takim nga Kancelari Federal i Austrisë, Sebastian Kurz, gjatë të cilit takim ndër të tjera u diskutua edhe për investimet dhe bashkëpunimin ekonomik

Përmes një komunikate për medie, është bërë e ditur se gjatë takimit u bisedua për rëndësinë e partneritetit mes Kosovës dhe Austrisë dhe zhvillimin e mëtejmë të marrëdhënieve bilaterale.

“Austria është investitori i pestë më i madh në Kosovë dhe bashkëpunimi ekonomik në mes dy vendeve po rritet në mënyrë të qëndrueshme. Kryeministri u shpreh i gatshëm dhe me vullnet të plotë që dy vendet të punojnë edhe më për së afërmi në këtë drejtim”, thuhet në komunikatë.

Kurti falënderoi kancelarin Kurz për mbështetjen e Austrisë për Republikën e Kosovës në të gjitha aspiratat e saj ndërkombëtare, duke përfshirë këtu procesin e integrimit në BE, organizata ndërkombëtare dhe veçanërisht në lobimin dhe mbështetjen për liberalizimin e vizave.

“Kryeministri Kurti po ashtu e falënderoi kancelarin Kurz për ndihmën e ofruar nga Austria përgjatë gjithë ballafaqimit me pandeminë Covid-19 dhe për sigurimin e vaksinave kundër pandemisë për Republikën e Kosovës dhe qytetarët e saj”, thuhet tutje.

Po ashtu, bëhet e ditur se mes temave të takimit ishte dhe sistemi i arsimit, përkatësisht reforma dhe zbatimi i sistemit dual të arsimit, ngjashëm sikurse ai në Austri, si një prej shtyllave kryesore të zhvillimit ekonomik.

Ndryshe, kancelari austriak, Sebastian Kurz, i cili ishte nikoqir i këtij Samiti, ka publikuar në Twitter një fotografi me Kurtin dhe ka shkruar se COVID-19 ka dëshmuar rëndësinë e partneritet të fuqishëm që duhet të kenë vendet mes vete.

Lexo po ashtu Kurz: Do ta vazhdojmë punën e mirë me Kosovën drejt integrimit evropian

Kurz, tutje shkroi se Kosova dhe Austria do ta vazhdojnë punën e mirë, drejt integrimit në BE-së.

“Kënaqësi ta mirëpres Albin Kurtin në Vjenë sot. COVID-19 na ka treguar se sa e rëndësishme është që të kemi partneritet të fuqishëm ndërkombëtar. Ne do të vazhdojmë punën e mirë me Kosovën drejt integrimit evropian”, ka shkruar Kruz.

Në Samitin e sotëm për Ballkanin Perëndimor, u bë e ditur se Austria do t’i dhurojë një milion vaksina për vendet e rajonit, me qëllim të luftimit të pandemisë COVID-19./Telegrafi/