Kryeministri në detyrë, Albin Kurti, ka shprehur mbështetje publike dhe lavdata për ministrin në detyrë të Bujqësisë, Faton Peci, në ditën kur ky i fundit u përball me hetimet e Prokurorisë Speciale lidhur me një kontratë të dyshuar prej 60 milionë eurosh për përpunimin e mbetjeve shtazore.
Peci është intervistuar për pesë orë me radhë nga organet e hetuesisë në cilësinë e të dyshuarit, por është liruar në procedurë të rregullt.
Kontrata në fjalë ka qenë subjekt i diskutimeve dhe shqetësimeve publike për mënyrën e menaxhimit dhe shpenzimit të fondeve publike.
Ndërkohë, gjatë së njëjtës ditë, Kurti ka përdorur platformën e tij në Facebook për të lavdëruar punën e Pecit, duke e përmendur me superlativa në kontekstin e hapjes së Panairit “Agrokos & Agroturizëm 2025”.
“Panairi AGROKOS & Agroturizëm 2025 – një ngjarje e përvitshme ku përfaqësohen prodhues të kulturave bujqësore, përpunues të frutave dhe të produkteve blegtorale, kompani të makinerive bujqësore, pijeve artizanale, ambalazhimit dhe standardizimit dhe agroturizmi, një sektor i cili po kthehet në një pasuri të re për vendin tonë,” ka shkruar Kurti.
Ai ka shtuar se arritjet në bujqësi janë rezultat i “trajtimeve me prioritet e seriozitet” që, sipas tij, janë bërë nga qeveria dhe nga “qeverisja e mirë e të suksesshme” e ministrit Peci.
Postimi i Kurtit vjen në një moment delikat për ministrin e Bujqësisë, ndërkohë që hetimet për kontratën e dyshuar mbeten të hapura.
Zëdhënësja e Prokurorisë, Arbnora Luta, tha se Peci u intervistua për disa orë në cilësinë e të dyshuarit për këtë rast.
Ai, pas intervistimit nga Njësia e Veçantë Hetimore, u lirua në procedurë të rregullt.
Të martën, Prokuroria Speciale autorizoi Policinë e Kosovës për të kryer bastisje më 27 maj në katër lokacione, lidhur me këtë rast.
Lidhur me hetimet për fabrikën për përpunimin e mbejtjeve shtazore është intervistuar edhe kryeshefi i Agjencisë së Ushqimit dhe Veterinarisë, Bekim Hoxha. Avokati i tij, Artan Çerkini njoftoi se Hoxha, që u intervistua në cilësinë e të dyshuarit, më pas është liruar në procedurë të rregullt.
Më herët gjatë ditës, prokurori i Prokurorisë Speciale, Admir Shala, më pas gjatë një paraqitje për media tregoi se bastisje janë kryer në Ministrinë e Bujqësisë, Agjencinë për Zhvillimin e Bujqësisë, Agjencinë e Veterinarisë, si dhe në lokacionin e kompanisë përfituese.
"Siç e dini, Prokuroria Speciale ka filluar një hetim lidhur me dhënien në shfrytëzim të fabrikës për përpunimin e produkteve shtazore. Hetimi është duke u zhvilluar lidhur me dyshimet e dhënies me qira të kësaj fabrike. Jemi në fazën e hetimit, jemi duke zhvilluar bastisjen dhe kontrollet në bazë të urdhrit të gjyqtarit të procedurës paraprake të Gjykatës Themelore të Prishtinës me kërkesë të Prokurorisë Speciale. Po ashtu, me autorizimin tonë, policia, së bashku me ne është duke ndërmarrë veprimet e nevojshme me qëllim të sigurimit të informacioneve të nevojshme dhe drejt zbardhjes zbardhjes të rastit konkret", tha ai.
Lidhur me aksionin në Ministrinë e Bujqësisë ka reaguar ministrja në detyrë e Punëve të Jashtme, Donika Gërvalla. Ajo e ka cilësuar si “inskenim të gërditshëm” aksionin e Prokurorisë, të udhëhequr nga Blerim Isufaj ndaj Pecit.
“Kur pikërisht ata që e kanë për detyrë ta mbrojnë shtetin ligjor dhe qytetarët e Republikës nga krimi i keqpërdorin organet e drejtësisë për hakmarrje dhe për të njollosur figurat e suksesshme dhe të pastra politike, atëherë asgjë më nuk duhet të na habisë”, shkroi Gërvalla në Facebook.
Për fabrikën për mbetje shtazore një ditë më herët kishte reaguar Partia Demokratike e Kosovës. Sipas kësaj partie, ministri në detyrë i Bujqësisë, Faton Peci, pa ankand publik, ia ka dhënë me qira pronën për impiantin për mbetjet shtazore një kompanie për 20 vjet.
PDK-ja tha se Ministria e Bujqësisë ka shkelur Ligjin për pronën publike, që tha se parasheh që pronat publike të jepen me qira vetëm përmes ankandit publik dhe jo më shumë se 15 vjet, përveç në rastet kur merre vendimi në Kuvendin e Kosovës.
