Kurti: Hapja e Urës mbi Ibër nuk është kundër askujt, e aq më pak ndaj partnerëve

Kryeministri i Kosovës, Albin Kurti në mbledhjen e sotme të Qeverisë ka folur sërish për çështjen e hapjes së Urës mbi lumin Ibër.

Kurti ka thënë se hapja e kësaj Ure është e drejtë dhe e nevojshme për të gjithë.

“Hapjen e Urës ne e konsiderojmë si një gjë të drejtë, të nevojshme dhe të dobishme për të gjithë. I kemi mirëpritur raportet preliminare të vlerësimit të qëndrueshmërisë së urës, të cilat i kemi ndarë  menjëherë dje me komandantin e KFOR-it në frymën e konsultimeve dhje koordinimit të vazhdueshëm që kemi”, tha Kurti.

Kryeministri shtoi se do të vazhdojnë konsultimet dhe koordinimet me partnerët e Kosovës për hapjen e Urës mbi Ibër.

“Qeveria e Kosovës dhe unë si kryeministër besojmë thellësisht se liria e lëvizjes dhe sundimi i ligjit në njërën anë dhe paqja e siguria në anën tjetër janë të mundura bashkë dhe të duhura për vendin, shoqërinë, shtetin. Do të vazhdojmë konsultimet dhe koordinimet me partnerët tanë”, tha Kurti.

Ai shtoi se hapja e urën nuk është kundër askujt e aq më pak ndaj partnerëve tanë.

“Hapja e Urës nuk është kundër askujt e aq më pak partnerëve tanë Kosova është shtet normal dhe urat e saj duhet të jenë të hapura”, tha ai. /Telegrafi/