Kryetari i Suharekës kthen në punë 5 zyrtarët që po gjykohen për keqpërdorim (Video)

Pas gjashtë muajsh suspendimi me gjysmë page, pesë zyrtarë të Komunës së Suharekës janë kthyer në punë.

Ndaj tyre, është duke vazhduar gjykimi në Gjykatën Themelore të Prizrenit me akuzën për keqpërdorim të detyrës zyrtare.

Të akuzuarit, katër roja të pyjeve dhe përgjegjësi i tyre, dyshohet se kanë lejuar largimin e një sasie me drunj nga fshati Delloc, por që ishin prerë në Parkun Kombëtar të Sharrit, raporton KTV.

Drejtori i Drejtorisë për Planifikim, Zhvillim, Bujqësi dhe Pylltari, Xhemajl Kabashaj, tregon se në kohën që ishin të suspenduar me gjysmë page zyrtarët e komunës, ata ishin detyruar të marrin në punë 5 zëvendësues, duke rritur shpenzimet e kësaj drejtorie.

Në Agjencinë Pyjore të Kosovës, thonë se janë disa raste të përfshirjes së rojave të pyjeve në aktivitete të paligjshme.

Gjyqësori, veprën penale për vjedhjet të pyjeve, që nga paslufta e ka injoruar, duke rezultuar me mijëra lëndë vjetërsuara.

Sipas një hulumtimi të organizatës “Çohu”, që nga viti 2001 e deri në vitin 2014, vepra ‘vjedhja e pyllit’ nga neni 358 i Kodit Penal, është parashkruar gjithsej 1783 herë.

https://vimeo.com/160381206