Kryeministri sllovak lirohet nga spitali

Kryeministri sllovak, Robert Fico, është liruar nga spitali pas plagëve të marra nga atentati ndaj tij.

Fico, 59 vjeç, u qëllua nga një distancë e afërt teksa përshëndetej me mbështetësit e tij pas një mbledhjeje të qeverisë në Handlova të Sllovakisë më 15 maj.

Bëhet e ditur se sulmi e la atë në gjendje të rëndë dhe të detyruar t’i nënshtrohej një operacioni pesë orësh.

Kryeministri përsëri pas dy ditësh i është nënshtruar një tjetër operimi, shkruan skynews, përcjell Telegrafi.

Lexo po ashtu Atentat ndaj kryeministrit të Sllovakisë, Robert Fico

Ndërkohë, tani drejtoresha e klinikës në qytetin e Banska Bystrica, Miriam Lapunikova, ka njoftuar se Fico është dërguar në shtëpi, prej ku edhe do të vazhdojë mjekimin.

Kjo pasi ditët e fundit gjendja e tij ishte përmirësuar.

Ndryshe, Fico është një popullist që më parë krahasohej me ish-presidentin amerikan, Donald Trump, si dhe njihet si dashamirës i presidentit rus, Vladimir Putin.

Ai u rikthye në politikë vitin e kaluar duke i fituar zgjedhjet parlamentare, gjë që e rriti frikën e qytetarëve se ai do ta braktiste qëndrimin pro-perëndimor të vendit të tij. /Telegrafi/