Krivokapiq dyshon se një deputet i pozitës do të votojë për rrëzimin e Qeverisë së Malit të Zi

Korrupsioni politik është një nga format më të këqija të korrupsionit, tha kryeministri malazez, Zdravko Krivokapiq, duke thënë se pret që Mali i Zi të bëhet rezistent ndaj kësaj dukurie, pavarësisht se kush çfarë marrëdhëniesh ka me Qeverinë.

Duke iu përgjigjur pyetjes së gazetarëve se çfarë rezultati pret nga votëbesimi ndaj Qeverisë, Krivokapiq tha se priste që një korrupsion tjetër politik të mos ndodhte, raporton rtcg.

“Korrupsioni politik është një nga format më të këqija të korrupsionit. Nuk e di nëse mund të krahasohet me korrupsionin e lartë. Ai korrupsion është i lidhur me elitën politike dhe ata në postet më të larta. Kjo është diçka që është e papërshtatshme për Malin e Zi”, tha Krivokapiq.

Ai beson se më e rëndësishmja është që Mali i Zi të ndjek një rrugë që, siç tha, është shumë e qartë – në të gjitha fushat të aplikohen standardet evropiane.

Duke komentuar pretendimet e deputetit demokrat, Boris Bogdanoviq se dikush nga shumica parlamentare mund të votojë për mosbesimin e Qeverisë për dhjetëra milionë euro, Krivokapiq tha se “diçka po thuhet”.

“Çdo gjë ka çmimin e vet, jo rastësisht sot thashë se buxheti vjetor prej rreth një milion eurosh është drejtuar drejt disa flukseve të çuditshme”, tha Krivokapiq.

Ndryshe, qeveria rrëzohet në rast se 41 prej 81 deputetëve votojnë për shkarkimin e kryeministrit. /Telegrafi/