Kremlini refuzon bisedimet për “planin e paqes” me Zelenskyn – thotë se Rusia do të vazhdojë të luftojë në Ukrainë

Kremlini hodhi poshtë të mërkurën mundësinë e bisedimeve me presidentin ukrainas Volodymyr Zelensky për një plan që ai kishte për t’i dhënë fund luftës dhe tha se Rusia do të vazhdojë atë që e quan “operacioni i saj special ushtarak” në Ukrainë.

Zelensky tha të martën se do t’ia paraqesë planin e tij – detaje të plota për të cilat ai nuk i zbuloi publikisht – presidentit të SHBA-së, Joe Biden dhe dy pasardhësve të tij të mundshëm.

Zelensky, duke iu drejtuar një konference shtypi, tha se inkursioni tre-javor i Kievit në rajonin e Kurskut të Rusisë ishte pjesë e planit të tij, por se ai përfshin gjithashtu hapa të tjerë në frontin ekonomik dhe diplomatik.

Ideja, tha Zelenskyy – i cili po i bën presion Uashingtonit të lejojë forcat e tij të përdorin armë me rreze të gjatë të furnizuar nga SHBA për të goditur thellë brenda Rusisë – ishte të detyronte Moskën t’i jepte fund luftës.

“Kjo nuk është hera e parë që dëgjojmë deklarata të tilla nga përfaqësues të regjimit të Kievit. Ne jemi të vetëdijshëm për natyrën e këtij regjimi të Kievit”, u tha gazetarëve zëdhënësi i Kremlinit, Dmitry Peskov kur u pyet për planin e Zelensky.

“Ne po vazhdojmë operacionin tonë special ushtarak dhe do t’i arrijmë të gjitha qëllimet tona”, ka shtuar ai.

Rusia është aktualisht e angazhuar në zmbrapsjen e inkursionit ukrainas që filloi më 6 gusht dhe po ecën përpara me ofensivën e saj në rajonin Donetsk të Ukrainës lindore.

Peskov tha gjithashtu se Rusia mbështeti pikëpamjen e Indisë për nevojën për një zgjidhje paqësore, por tha se ishte “më se e qartë” se nuk kishte asnjë bazë për bisedime tani.

Kryeministri indian Narendra Modi tregoi të martën se i kishte thënë presidentit rus Vladimir Putin në një telefonatë se ai mbështeste një zgjidhje të hershme paqësore të konfliktit të Ukrainës, disa ditë pasi Modi zhvilloi bisedime me Zelenskyn në Kiev. /Telegrafi/