Krasniqi: Tash gjithçka është ndryshe dhe më mirë në veri

Ministri i Administrimit të Pushtetit Lokal, Elbert Krasniqi, ka thënë se situata në veri të vendit është më e mirë sesa para mandatit të Qeverisë Kurti.

Krasniqi tha se situata në veri që është më e mirë e dëshmojnë zhvillimet e fundit, investimet publike dhe sipas tij, nuk është më valide pyetja se “a është njëjtë apo ka ndryshuar veriu”.

“Unë e di se si ka funksionuar para fillimit të mandatit tonë apo edhe në fillim të mandatit tonë ajo pjesë dhe si është ajo pjesë tash. Ndryshimi është evident. Tash kemi gjithçka ndryshe dhe gjithçka më mirë”.

“Nuk krahasohet me periudhat më herët, pasi tash ka kryetarë që janë aty për qytetarët, ke Polici të Kosovës për t’i mbështetur qytetarët dhe jo si më herët, ata që u larguan nga Policia e Kosovës që tashmë del të jenë bashkëpunëtorë të regjimit të Serbisë dhe ke institucione qendrore që kanë shumë projekte të zhvilluara në atë pjesë, ku përfitues janë qytetarët”, tha Krasniqi në “DPT te Fidani” në Klan Kosova.

Tutje, ai tha se sot nëse një individ në veri vepron në kundërshtim me ligjin, nuk është më i sigurt që të shkojë në shtëpi “si më herët e ta vazhdojë gjumin”.

Krasniqi ka thënë se ka kryetarë komunash që kanë besuar se mund t’i ndalin proceset me faktin që sipas tij, ka dallime të përkatësisë etnike mes tyre dhe ndaj tij.

Ai tha se ka pasur paragjykime konkrete, e ku sipas tij, ka pasur edhe diskutime ku është thënë se “me 3 mijë vota është bërë ministër”.

“Ka kryetarë komunash që janë më të hapur, ka kryetarë komunash që janë më të ngarkuar, mund ta përmendi kryetarin e Komunës së Vitisë, i cili është më i ngarkuar në këto çështje. E keqja është që asnjëherë në prezencë, por nga mosprezenca ime e ka shfrytëzuar mundësinë që të ngritë dyshime çfare do qofshin”.

“Kemi pasur një situatë ku e kemi bërë një auditim në komunën e Vitisë dhe nuk ka qenë shumë bashkëpunues me pjesën e stafit që unë e kam dërguar dhe ka menduar që mund ta ndalë një proces. Edhe ai e ka parë si të gjithë të tjerët që s’mund ta ndalë asnjë proces mbi asnjë bazë, e sidomos mbi baza etnike”, tha Krasniqi.