Krasniqi: 100 milionët që Kurti ia ndau KEDS-it kanë mundur të shkojnë për sigurinë dhe FSK-në

Kryetari i Partisë Demokratike të Kosovës, Memli Krasniqi, ka thënë se PDK nuk e ka fajësuar kryeminitsrin për krizën sepse nuk ka qenë faji i tij por një krizë globale, por faji ka qenë menaxhimi i situatës.

“Kur shtetet e rajonit merrnin masa në lidhje me këtë çëstje, zotëri Kurti nuk na dëgjonte. Më mirë do të ishte që këto 100 milionë euro ti jepnim për sektorin e sigurisë, për FSK-në, sesa me ja dhanë KEDS-it”, ka thënë Krasniqi.

Më tej, ai ka thënë se ZRRE ishte instrument i Kryeministrit Kurti dhe kjo është dëshmuar përmes veprimeve të tyre.

“Komentet tona kanë qenë të qarta. Ne kemi kërkuar qysh në fillim të nëntorit që të hiqet TVSH-ja. Hera e parë në histori të institucioneve të pavarura të Kosovës, që na njofton ne se çfarë do të bëjë Qeveria, pa vendosë akoma Qeveria. Asnjë deklaratë nga Qeveria nuk ka pasur më herët. Çka tregon kjo? Se ZRRE e ka bërë një raport bashkë me Ministrën e Ekonomisë dhe Kryeministrin.”, ka thënë Krasniqi.

Ai po ashtu shtoi se vendimi për ndalimin e rritjes së çmimeve do të duhej të niste nga çmimi i rrymës.

Kreu i PDK foli edhe për seancën ku do të votohet Projektkodi Civil.

“Debati është i mirëseardhur është i domosdoshëm. Ne vendimin do ta japim në ditën kur do të votohet dhe ne ishim të gatshëm ta japim edhe në seancën kur u caktua të votohet ky projektkod, por shumica parlamentare, e prirë nga Vetëvendosja kërkoi që të hiqet.”, tha ai.

Krasniqi konsideron se është e padrejtë që të kërkohet përgjigje për qëndrimin e PDK-së lidhur me çështjen e Projektkodit Civil, debati për të cilin është reduktuar në lejimin e martesave mes gjinive të njëjta, pa kërkuar së pari nga kryeministri të deklarohet në lidhje me këtë çështje.

“Në kuptimin formal shumicës nuk i duhen votat tona, por ne e kemi obligim dhe do të votojmë siç e kemi marrë vendimin si parti”, tha ai në RTK.