Kovaçevski: Votimi i ndryshimeve kushtetuese është votë për të ardhmen evropiane të qytetarëve

“Qëllimi strategjik është anëtarësimi i plotë i Maqedonisë së Veriut në BE”, thotë kryeministri Dimitar Kovaçevski në një intervistë për gazetën gjermane “Frankfurter Allgemeine Zeitung”.

Ai thotë se “procesi i integrimit evropian të vendit garanton sigurinë dhe stabilitetin e rajonit, por edhe bashkëpunim më të mirë ekonomik”.

Kovaçevski në intervistë flet për vendimet e ardhshme politike që duhet të merren në vend dhe nga të cilat varet e ardhmja evropiane e qytetarëve.

“Votimi nuk ka të bëjë vetëm me kushtetutën tonë, por me të ardhmen evropiane të vendit tonë. Ky vendim që duhet të marrim tani është për të mos vonuar procesin e mëtejshëm. Vetoja për anëtarësimin tonë ka ardhur gjithmonë nga jashtë, tani rrezikon të vijë nga brenda për herë të parë”, thotë Kovaçevski.

“Kur morëm pavarësinë pas përfundimit të Jugosllavisë, ekonomia jonë ishte shumë më e fortë se ajo e Bullgarisë, Republikës Çeke, Sllovakisë apo Polonisë. Në atë kohë ishte e pamendueshme që njerëzit nga Maqedonia të shkonin në një nga këto vende për të punuar atje. Sot kjo është pikërisht ajo që po ndodh. Ekonomitë e këtyre vendeve nuk janë forcuar vetëm për shkak të performancës së tyre. Përkundrazi, kjo ndodhi sepse këto vende u bënë anëtare të Bashkimit Evropian, me një treg të përbashkët prej gati gjysmë miliardë banorësh. Kjo është arsyeja pse anëtarësimi është një qëllim strategjik për Maqedoninë e Veriut. Ne duam të jetojmë në një vend të BE-së”, tha kryeministri për gazetën gjermane “Frankfurter Allgemeine Zeitung”.