“Kosovarët ia dolën ta korruptojnë edhe Bashkimin Evropian” (Video)

Eurodeputetja Ulrike Lunacek në një intervistë të dhënë për emisionin “Jeta në Kosovë”, shprehet të jetë tronditur kur ka dëgjuar për përmasat e akuzave të cilat i ka publikuar prokurorja tashmë e suspenduar ndërkombëtare, Maria Bamieh, për përfshirje në afera korruptive të kolegëve të saj prokurorë e gjykatës.

“Meqë është shpalosur lajmi gjoja se ka korrupsion brenda EULEX-it dhe gjoja se edhe në nivele të larta prokurorie, kjo është me të vërtetë tronditëse”, tha Lunacek.

Dhe duke qenë se Kosova i ka marrë disa vjet të karrierës politike, ajo e ka një shqetësim. Thotë se ka ditë që në Bruksel po dëgjon njerëz duke thënë se “kosovarët ia dolën ta korruptojnë edhe Bashkimin Evropian”.

“Ka momentalisht prej atyre që thonë… se kosovarët kanë infektuar Bashkimin Evropian dhe se që të gjithë janë të korruptuar, prandaj nuk na duhet shteti i Kosovës dhe gjithsesi nuk na duhet as BE-ja”, thotë Lunacek. “Janë duke u bërë këso lloj lidhjesh, dhe unë këtë nuk e dua”.

Lunacek thotë se Bashkimi Evropian dhe EULEX duhet t’i ofrojë mbrojtje prokurores Maria Bamieh, e jo ta suspendojë atë për shkak të dyshimeve se ajo i ka nxjerrë akuzat në publik. Sipas saj, vetë Parlamenti Evropian mund të nisë nj hetim për dyshimet e përfshirjes në korrupsion të prokurorëve dhe gjykatësve të këtij misioni.

“Në qoftë se ka pasur korrupsion brenda EULEX-it, këta njerëz duhet të dalin para gjyqit. Siç kam thënë më parë, nuk ka tolerancë, ata duhet të dënohen”, tha Lunacek për Jeta në Kosovë. /kallxo.com/