Osmani tregon për të gjitha takimet në kuadër të Konferencës Globale për Ndryshimet Klimatike në Dubai

Në një ngjarje të rëndësishme botërore, Republika e Kosovës u përfaqësua për herë të parë në nivelin më të lartë shtetëror në Konferencën Globale për Ndryshimet Klimatike, COP28, pasi u ftua nga Presidenti i Emirateve të Bashkuara Arabe.

Kjo pjesëmarrje shënon një moment domethënës për Kosovën në skenën ndërkombëtare, veçanërisht në fushën e dialogut global mbi ndryshimet klimatike dhe qëndrueshmërinë e mjedisit.

Delegacioni i Kosovës u mikprit dhe përkrah nga Emiratet e Bashkuara Arabe, ku morën pjesë në një sërë takimesh dhe aktivitetesh me liderë të lartë nga e gjithë bota dhe thelluan lidhjet e bashkëpunimit ndërkombëtar.

Kosova u prezantua si një partner aktiv dhe i përkushtuar në luftën kundër ndryshimeve klimatike dhe në zbatimin e masave për zhvillim të qëndrueshëm.

Gjatë konferencës, Presidentja e Kosovës pati nderin të takohet me emra të rëndësishëm të skenës politike botërore.

Ajo gjithashtu zhvilloi bisedime konstruktive me liderë të tjerë të shteteve dhe qeverive, duke përfshirë presidentë dhe kryeministra nga një gamë e gjerë e vendeve, duke shtrirë spektrin e diplomacisë dhe bashkëpunimit të Kosovës në nivel të lartë.

“Përveç takimit me Lartmadhërinë e Tij, Presidentin e Emirateve, Sheikh Mohamed bin Zayed Al Nahyan, kisha mundësinë të takoj e të bashkëbisedoj edhe me të deleguarin e Presidentit Biden, ish-Sekretarin Kerry, Presidentin e Indonezisë, Presidentin e Kenias, Presidenten e Komisionit Evropian, Presidentin e Surinamit, Mbretin e Lesotos, Presidenten e Sllovenisë, Presidentin e Bullgarisë, Presidentin e Nigerisë, Kryeministrin e Shqipërisë, Kryeministren e Danimarkës, Kryeministrin e Eswatinit, Kryeministrin e Çekisë, Kryeministrin e Antigua dhe Barbuda, Kryeministrin e Suedisë, Kryeministrin e Sao Tome dhe Principe, Kryeministrin e Libanit, Zv. Presidentin e Gambisë, Drejtoreshën Ekzekutive të MCC-së, Administratorin e UNDP-së dhe liderë të tjerë”, ka shkruar presidentja Vjosa Osmani në Facebook.

Ndër aktivitetet e tjera, delegacioni i Kosovës shfrytëzoi mundësinë për të prezantuar hapat dhe iniciativat e vendit për të adresuar sfidat klimatike.

Ata paraqitën një vizion të qartë dhe strategji të bazuar në projekte inovative dhe partneritete me aleatë ndërkombëtarë, për të promovuar qëndrueshmërinë mjedisore dhe për të siguruar një të ardhme më të ndritur dhe të sigurt për qytetarët e Kosovës në përballjen me efektet e ndryshimeve klimatike./Telegrafi/