Komuniteti Mysliman i Shqipërisë cakton pesë rregulla për këtë Ramazan

Të premten fillon muaji i bekuar i Ramazanit, i cili  për shkak të pandemisë, do të  jetë ndryshe, pa lutjet e përbashkëta  të besimtarëve.

Kreu  i Komunitetit Mysliman Bujar Spahiu i ka bërë thirrje besimtarëve që të respektojmë rregullat dhe protokollet, për t’u mbrojtur nga Covid-19.

“Situata e krijuar nga Covid-19 na ka detyruar që Ramazanin këtë vit ta përjetojmë kryesisht brenda një rrethi të ngushtë dhe familjar. Me shpresën dhe lutjet që tubimet për teravi, namaze nate dhe përjetimi i këtij muaji me xhemat të kthehet sa më shpejt”.

Kreu i Komunitetit Mysliman  i këshillon besimtarët që të mos harrojnë gjatë këtyre ditëve që iftaret e përvitshme le ti kthejmë në ndihma për familjet në nevojë.

Kreu i komunitetit mysliman  uron besimtaret agjërim të mbarë  dhe  sjelltë ky muaj begati, mirësi, paqe në familjet e gjithë shqiptarëve shoqërinë.

“Lus zotin që kjo situatë e krijuar nga koronavirusi të largohet sa më shpejt dhe të rikthehemi sërish tek përjetimi i namazeve në xhami, iftareve të përbashkëta dhe takimeve vëllazërore”, u shpreh ai.

Komuniteti Mysliman i Shqipërisë merr këto vendime:

1. Ngarkohen të gjithë myftinjtë dhe stafi i tyre të ndërmarrin fushata sensibilizuese dhe të informojnë të gjithë besimtarët që muajin e Ramazanit dhe ritualet fetare t’i kryejnë në banesat e tyre.
2. Gjatë Muajit të Ramazanit anulohet edhe falja e namazit të Teravive me xhemat dhe organizimi i iftareve të përbashkëta, deri në një vendim të dytë.
3. Vazhdon të jetë në fuqi anulimi i tubimeve masive si: ligjërata, kurse në xhami, namazi i Xhumasë dhe të gjitha aktivitetet me natyrë tubuese.
4. Ezani të vazhdojë të thirret në mënyrë të rregullt në të gjitha xhamitë.
5. Zbatimi me rigorozitet i të gjitha sugjerimeve dhe këshillave të nxjerra nga autoritetet përkatëse në vendin tonë si dhe nga Organizata Botërore e Shëndetësisë.