Komuna e Prishtinës përgatitet për ndryshimin e motit, kompanitë për mirëmbajtjen e rrugëve do të jenë në terren me të gjitha kapacitetet

Muaji shkurt i këtij viti sapo ka filluar dhe në Kosovë temperaturat deri më tani rrallë herë kanë qenë nën 0, duke bërë kështu që të ketë edhe mungesë të borës e shiut.

Por, ky mot pritet të ndryshoj gjatë ditëve në vijim, pasi Instituti Hidrometeorologjik i Kosovës ka bërë të ditur se sipas parashikimeve priten reshje shiu e bore.

Duke marrë parasysh këtë parashikim të Institutit, Komuna e Prishtinës ka marrë masa tashmë, duke kontaktuar kompanitë për mirëmbajtjen e rrugëve urbane e rurale.

Këtë e bëri të ditur drejtoresha e Drejtorisë së Shërbimeve Publike, Mbrojtjes dhe Shpëtimit në Komunën e Prishtinës, Medina Braha.

Braha ka bërë thirrje gjithashtu që vozitësit të kenë kujdes gjatë vozitjet nëpër rrugët e Prishtinës. Moti, nga sot pasdite reshje bore dhe ftohtë

Ndryshe, Instituti Hidrometeorologjik i Kosovës ka bërë të ditur se ditëve me diell dhe me temperatura të larta mbi vlerat e mesatareve po i vjen fundi, kjo si pasojë e masave të ftohta të ajrit me origjinë nga veriu i kontinentit.

Në njoftimin për media thuhet se nga pasditja e së martës vendi ynë do të përfshihet nga masat e ajrit me presion të ulët atmosferik, duke e prishur këtë situatë të tanishme meteorologjike.

Lexo po ashtu Moti, nga sot pasdite reshje bore dhe ftohtë

Fillimisht do të fillojnë reshje shiu, e me fuqizimin e këtyre masave polare, reshjet e shiut do të kalojnë në formë dëbore.

“Reshje bore parashihet natën e së martës, mërkurës dhe pjesën e parë të ditës së enjte. Këto reshje do të ndikojnë dukshëm në prishjen e ekuilibrit termik, duke ndikuar në rënien e temperaturave në të dy vlerat ekstreme”, thuhet në njoftim.

Temperaturat minimale parashihen të lëvizin ndërmjet 4 deri në -7 gradë Celsius, ndërsa maksimalet e ditës parashihen të lëvizin ndërmjet 2-16 gradë Celsius.

Kjo situatë meteorologjike rikthen parametrat meteorologjik në mesataret e stinës dhe muajit që jemi, por reshjet e parashikuara do të jenë shumë të mirëseardhura për ti plotësuar kushtet hidrike, meqë dihet se vendi ynë është në deficit të reshjeve që prej vitit të kaluar.

Situata biometeorologjike do të jetë relativisht e mirë për shkak të prezencës së këtij aktiviteti meteorologjik. Do të fryjë erë nga drejtimi i jugperëndimit dhe veriperëndimit me shpejtësi 1-15 m/s. /Telegrafi/