Komuna e parë në Kosovë e prekur nga COVID-19, “shpall” fitoren ndaj coronavirusit

Klina ka qenë komuna e parë në Kosovë që ka pasur qytetarë të prekur nga COVID-19.

Që nga rasti i parë me COVID-19, Klina ka qenë në karantinë. Por bashkë më shumë komuna tjera nga sot edhe Klina ka dalë nga karantina.

Kryetari Zenun Elezaj është shprehur i kënaqur nga kjo masë pasi sipas tij dy muaj izolim kanë qenë të vështira për qytetarët e kësaj komune.

Elezaj në RTV Dukagjini ka folur edhe për rastet nga kjo komunë, ku sipas tij sonte pritet të shërohet plotësisht edhe pacienti i fundit i prekur me COVID-19.

“Deri më tani kemi pasur pesë raste por vetëm njëri është ndërlidhur me aktivitetet brenda komunës, ndërsa tjerët janë lidhur me aktivitetet jashtë komunës. Fatmirësisht katër janë shëruar plotësisht dhe rasti i pestë në ritestimin e parë ka dalë negativ dhe shpresojmë se edhe sot do të del negativ dhe më nuk do të kemi raste me COVID-19 në Komunën e Klinës”, tha ai, përcjell Telegrafi.

Kryetari i Klinës thotë se do të mblidhet shtabi emergjent për të parë mundësinë se si të ndihmojnë bizneset.

“Mundësitë e komunave janë të vogla por do të shohin çfarë mund të bëjmë për bizneset”, tha ndër të tjera Zenun Elezaj./Telegrafi/