Komuna e Mitrovicës dënon sulmin ndaj drejtorit dhe zyrtarëve të kompanisë Rajonale të Mbeturinave ”Uniteti”

Komuna e Mitrovicës ka dënuar sulmin fizik ndaj drejtorit, zyrtarëve të kompanisë “Uniteti” dhe zyrtarëve policorë, të cilët kanë pësuar lëndime trupore derisa ishin të pranishëm gjatë pastrimit të deponisë së mbeturinave në fshatin Koshtovë të Mitrovicës, transmeton Telegrafi.

Komuna e Mitrovicës në reagimin e bërë ka fajësuar pronarin e restaurant ‘Ibrit’, për organizimin e këtij sulmi.

Lexo po ashtu Përleshje fizike gjatë protestës në Mitrovicë, gjashtë të lënduar

Reagimi i plotë:

Komuna e Mitrovicës, e dënon ashpër sulmin fizik ndaj drejtorit, zyrtarëve të kompanisë “Uniteti” dhe zyrtarëve policor, të cilët sot pësuan lëndime trupore nga persona të papërgjegjshëm, gjatë pastrimit të deponisë së mbeturinave në fshatin Koshtovë të Mitrovicës.

Ky sulm brutal dhe i ulët është organizuar nga pronari i Restaurant “Ibri”, së bashku me disa banorë të atij fshati, dhe kjo nuk është hera e parë që këta individ organizojnë bllokime të rrugës dhe pengojnë aktivitetet e kompanisë “Uniteti”.

Ndërsa është për tu bërë e ditur se Restaurant “Ibri” qe 15 vite veprimtarinë e tij biznesore e ushtron pa leje ndërtimi nga ana e komunës.

Komuna e Mitrovicës kërkon nga Policia e Kosovës dhe organet e hetuesisë që të ndërmarrin të gjitha masat e nevojshme për zbardhjen e këtij rastit, dhe se kjo nuk është mënyrë për të zgjidhur problemet, por janë organet përgjegjëse ato që trajtojnë çdo mosmarrëveshje dhe pakënaqësi. /Telegrafi/

Lexo po ashtu Drejtori i KRM "Uniteti" flet për sulmin që iu bë atij dhe zyrtarëve të kësaj kompanie nga banorët e fshatit Koshtovë