Komuna e Ferizajt e para në Kosovë me numrin më të madh të familjeve strehuese

Komuna e Ferizajt është e para në Republikën e Kosovës me gjashtë familje strehuese dhe dy të tjera në proces të vlerësimit. Kjo komunë prej vitesh një rëndësi të veçantë i ka kushtuar fëmijëve pa përkujdesje prindërore dhe atyre me nevoja të veçanta. Në një takim të mbajtur sot në mes të zyrtarëve komunal, drejtuesve të Qendrës për Punë sociale dhe me përfaqësues të OFAP-it, është debatuar lidhur me familjet strehuese dhe trajtimin e fëmijëve.

Në këtë takim u bë e ditur se Komuna e Ferizajt në nivel  të vendit është e para me numrin më të madh të familjeve strehuese gjersa kjo do të avancohet tutje edhe me marrëveshjen që pritet të nënshkruhet nga Komuna me organizatën OFAP me qëllim të mbështetjes për fëmijët në nevojë në partneritet me QPS-në dhe DShMS-në

Në këtë takim, nënkryetari i Komunës Lulzim Aliu theksoi se, “Komuna ka ofruar dhe po ofron mbështetje për familjet strehuese gjersa kjo mbështetje do të vazhdoj edhe në kuadër të programeve që ka Drejtoria e Shëndetësisë dhe Mirëqenies Sociale”, ka thënë midis të tjerash Aliu.

Drejtori i DShMS-së, Kemajl Emini duke theksuar gatishmërinë për mbështetje për fëmijët në familjet strehuese tha se, “DShMS ka përfshirë në skemat e saj mbështetëse këto familje, ashtu që me mundësitë buxhetore të mbështeten këto familje”, ka thenë Emini./Telegrafi/