Komenti i Zanettit rreth deklaratave të Wandas: Secili duhet ta respektojë rolin e vet

Zëvendëspresidenti i Interit, Javier Zanetti, i ka komentuar deklaratat e agjentes së Mauro Icardit lidhur me kontratën e re të sulmuesit argjentinas.

Wanda Icardi, gruaja dhe përfaqësuesja e 25-vjeçarit, ka thënë gjatë kësaj jave se Nerazzurrët as që i kanë ofruar kontratë të re bashkëshortit të saj, edhe pse ka pasur raportime se ai ka marrë një ofertë prej gjashtë milionë eurosh për sezon.

“Ka të bëjë me respektin, gjithkush duhet ta respektojë rolin e vet”, është shprehur Zanetti gjatë një prononcimi në Radio Deejay.

Lexo po ashtu Lajmet për Interin

“Më e rëndësishmja është se Mauro është i lumtur, këtë e mund ta shohim me mënyrën e shfaqjes së cilësive që i ka dhe kjo tregon se është shumë i kënaqur”, ka shtuar legjenda e zikaltërve.

Theksojmë se Wanda është shprehur e pakënaqur me mënyrën se si klubi është duke e trajtuar kapitenin, ndërsa ka thënë se Interi ka dashur ta shesë Icardin te Juventusi, por ai ka refuzuar të shkojë.

Nga ana tjetër, drejtori Piero Ausilio ka theksuar se Nerazzurrët i kanë bërë ofertë për kontratë të re argjentinasit para dy muajsh, porse ai nuk e ka pranuar.

“Pjesa tjetër nuk ka rëndësi: Janë objektet zyrtare, unë jam në dispozicion të të gjithëve. Agjentja e Icardit e di ku të më gjejë, ose në zyrë ose përmes telefonit”, ishin fjalët e Ausilios. /Telegrafi/