Kë e preferojnë yjet në rolin e James Bondit?

Jason Bourne, i fundit i serisë së filmave “Bourne”, pati të hënën në Londër premierën evropiane. Aktori Matt Damon kthehet pas nëntë vitesh në rolin e ish-agjentit të trazuar të CIA-s.

Dhe, meqenëse ra fjala tek agjentët sekretë, Damon pak dyshime ka se kë do të preferonte në kostumin e të famshmit James Bond – aktorin britanik, Idris Elba.

“Idris më pëlqen, është i shkëlqyer. E kam parë në çdo gjë që ka bërë dhe është shumë i mirë. Them se ai do ta përmirësonte filmin”, ka deklaruar Damon, transmeton TCH.

Në fakt, ai nuk është i vetmi që ndan këtë mendim. Zoe Saldana, përpara tij, e ka përqafuar idenë me mjaft entuziazëm, e madje thotë se Elba duhej ta kishte bërë këtë gjë me kohë.

Të shumtë janë ata që do të preferonin një ndryshim dhe deri tani është lakuar sa mundësia e një Bondi me ngjyrë, aq edhe ajo e një superagjenteje femër, të cilës ia kanë gjetur dhe emrin, Jane Bond. Favoritja numër një për interpretimin e të parës grua Bond në histori është Gillian Anderson.

Elba duket një mundësi interesante, por gara është e fortë dhe për t’u kthyer në agjentin e ardhshëm të “MI6”, atij do t’i duhej të konkurronte me James Norton, Aidan Turner dhe Tom Hiddleston.