Kanadaja do të konfiskojë asetet e Roman Abramovichit

Qeveria kanadeze ka njoftuar se do të fillojë procesin e sekuestrimit dhe konfiskimit të 26 milionë dollarëve nga Granite Capital Holdings Ltd, një kompani në pronësi të oligarkut të sanksionuar rus, Roman Abramovich.

Ky është rasti i parë i qeverisë kanadeze duke përdorur kompetenca të reja për të sekuestruar pronat që u përkasin individëve të sanksionuar, sipas një deklarate nga Ministria e Punëve të Jashtme.

Ministrja e Jashtme, Melanie Joly tani do të shqyrtojë paraqitjen e një kërkese gjyqësore për konfiskimin e aseteve dhe nëse është e suksesshme, të ardhurat mund të përdoren për të rindërtuar Ukrainën dhe për të kompensuar viktimat e pushtimit rus. Joly tha se “Kanadaja do të vazhdojë të bëjë presion ndaj regjimit rus dhe atyre që përfituan nga pushtimi barbar i Ukrainës nga Putin”.

Përfaqësuesit e Granite Capital Holdings ose Abramovich nuk mund të kontaktoheshin për koment, sipas Reuters. Oligarkët rusë janë pjesëmarrës në pushtim dhe Kanadaja “nuk do të jetë një strehë për përfitimet e tyre të paligjshme”, tha në një deklaratë ministrja kanadeze e financave Chrystia Freeland.

Moska e quan pushtimin e saj një “operacion special ushtarak” që synon “çmilitarizimin” dhe “denazifikimin” e pretenduar të fqinjit të saj, raporton bloomberg.

Kievi dhe aleatët e tij, të cilët vendosën sanksione të gjera në përgjigje të pushtimit, e quajnë atë një akt të paprovokuar agresioni. Kanadaja ka vendosur sanksione ndaj më shumë se 1500 individëve dhe subjekteve nga Rusia, Ukraina dhe Bjellorusia që nga fillimi i pushtimit më 24 shkurt. /Telegrafi/