Jonida Maliqi rikthen magjinë e Parashqevi Simakut me performancën e “E duam Lumturinë”

Jonida Maliqi ka sjellë një performancë emocionuese dhe të paharrueshme gjatë shfaqjes së saj, duke interpretuar këngën legjendare “E duam Lumturinë”.

Kjo këngë, e cila u prezantua në Festivalin e 27-të të Këngës në vitin 1988 nga Parashqevi Simaku, fitoi çmimin e parë dhe u shndërrua në një hit të paharrueshëm në muzikën shqiptare.

Në këtë performancë, Jonida e riktheu atë moment të veçantë me një kujdes të jashtëzakonshëm për detajet.

Ajo ishte veshur me një fustan të ngjashëm me atë të Parashqevisë nga ajo kohë, duke e përshkuar skenën në mënyrë të tillë që të krijonte një pasqyrë të pastër dhe të gjallë të asaj periudhe.

Po ashtu, ajo kishte të ftuar një kor të fëmijëve që performonin bashkë me të, duke e rikrijuar me mjeshtëri atë performancë të paharrueshme.

Një ekran i madh pas saj shfaqte pamjet e Parashqevi Simakut, e cila ishte një ikonë e muzikës popullore dhe këngës së lehtë shqiptare.

Parashqevi njihej për sharmin dhe rrezatimin e saj, duke fituar zemrat e publikut me zërin dhe stilin e saj të veçantë.

Ajo ishte padyshim një figurë e shquar e asaj kohe dhe një yll që mbeti në kujtesën e dashamirësve të muzikës shqiptare.

Jonida, me këtë interpretim, jo vetëm që nderoi trashëgiminë muzikore të Parashqevisë, por gjithashtu solli një shpërthim të emocioneve për të gjithë ata që ishin të pranishëm dhe për ata që e ndoqën performancën në distancë. /Telegrafi/