Java e 38-të e shtatzënisë: Bebja juaj pret një moment për të hyrë në botë, por ju duhet t’i kushtoni vëmendje disa simptomave

Ka ardhur java e tridhjetetetë e shtatzënisë dhe ja ndryshimet që mund të prisni në të kur bëhet fjalë për beben, por edhe për ju

Ka ardhur java e tridhjetetetë e shtatzënisë, bebja do të vijë shumë shpejt, por duhet t’i kushtoni vëmendje shëndetit, sepse disa simptoma mund të jenë shenjë që duhet të kërkoni menjëherë ndihmën e mjekut.

Çfarë po ndodh me beben?

Bebja ka shtuar mjaft peshë tani. Ajo peshon rreth 3.000 gram dhe është mbi 49 cm e gjatë. Ka një shtrëngim të fortë, të cilin do ta ndieni kur ta mbani për herë të parë për dore. Organet e saj janë të pjekura dhe të gatshme për jetën jashtë. Mjeku do të vlerësojë se sa e madhe është bebja tani, por askush nuk mund të thotë me siguri se sa e madhe do të jetë në lindje.

A po pyesni se çfarë ngjyre kanë sytë e bebes suaj? Ndoshta nuk do ta mësoni as në muajt e parë të jetës së saj. Nëse dikush ka lindur me sy kafe, me siguri do të mbetet i tillë. Nëse një fëmijë lind me sy gri ose blu të errët, mund të ndodhë që kur të mbushë nëntë muajsh, ata të marrin ngjyrë të gjelbër ose kafe. Kjo ndodh sepse irisi i syrit (pjesa e ngjyrosur e syrit) rritet në pigment në muajt pas lindjes (sytë e gjelbër, kafe dhe të zinj kanë më shumë pigment se sytë gri ose blu), transmeton Telegrafi.

Çfarë po ndodh me mamin?

Të gjitha sëmundjet që keni pasur javët e fundit janë ende duke ju shqetësuar. Ënjtja e herëpashershme e këmbëve dhe kyçeve është tashmë normale, por telefononi mjekun nëse vëreni ënjtje të pazakontë ose të papritur të këmbëve, kyçeve ose duarve, ënjtje të fytyrës dhe syve të fryrë ose shtim të papritur në peshë. Gjithashtu tregoni mjekut nëse keni dhimbje koke të herëpashershme ose të vazhdueshme, ndryshime të shikimit (vizion të dyfishtë, shikim të paqartë, shikim të pikave ose ndezje, ndjeshmëri ndaj dritës ose humbje të papritur të shikimit), dhimbje të forta në pjesën e sipërme të stomakut, të përziera ose të vjella. Këto janë simptoma të një gjendjeje serioze të quajtur preeklampsi.

Kini kujdes të mos dehidratoheni! Pini mjaftueshëm lëngje dhe hani sa më shumë fruta dhe perime për të reduktuar problemet me tretjen. Komposto me lëng ose kumbulla të thata dhe shëtitje të shkurtra do t’ju vijnë në ndihmë në luftën kundër kapsllëkut.

Kontrolloni nëse foshnja ka lëvizur të paktën 10 herë gjatë ditës. Nëse ajo duket jashtëzakonisht e qetë, telefononi mjekun.

Lexo po ashtu Java e 37-të e shtatzënisë: Bebja është plotësisht e pjekur dhe gati për jetën jashtë mitrës

Çfarë duhet të bëni?

Pushoni sa më shumë. Deri tani me siguri i keni përfunduar të gjitha përgatitjet. Tani pushoni! Nëse e keni të vështirë të ndiheni rehat në shtrat, vendosni jastëkë shtesë poshtë barkut. Një jastëk midis gjunjëve do t’ju ndihmojë të relaksoni shpinën.

Mësoni si të kujdeseni për një të porsalindur. Pas lindjes nuk do të keni shumë kohë për të lexuar, ndaj mësoni tani si të kujdeseni për fëmijën tuaj në muajt e parë të jetës. Shumë gjëra të dobishme do të mësoni në qendrën e këshillimit. /Telegrafi/