Jahjaga: Nën koordinimin tim, u arrestuan rreth 60 qytetarë për pjesëmarrje në luftëra të huaja

Ish-presidentja e vendit, Atifete Jahjaga, përmes një postimi në rrjetin social “Facebook” ka shkruar se prioritet i mandatit të saj ka qenë luftimi i dukurisë së ekstremizmit të dhunshëm në vend.

Në postimin e saj, ajo ka shkruar se ky kërcënim nuk është injoruar asnjëherë nga organet e rendit, duke pasur parasysh operacionet që janë ndërmarrë për arrestimin e qytetarëve që kanë marrë pjesë në luftërat e huaja apo u janë bashkuar organizatave terroriste.

Sipas Jahjagës, operacionet e tilla i kanë dhënë goditje ekstremizmit të dhunshëm përmes mbylljes së xhamive ilegale dhe organizatave gjoja humanitare që kanë shërbyer si fronte për t’i indoktrinuar qytetarët e Kosovës dhe për t’i financuar kauzat terroriste.

Më poshtë mund ta lexonit të plotë postimin e saj në Facebook:

“Nga debati i sotëm, gjithsesi i nevojshëm, jam e shtyrë t’i rikthehem një prioriteti që ka përshkuar pothuaj tërë mandatin tim si Presidente e Republikës së Kosovës në periudhën 2011-2016, për t’i ofruar disa sqarime dhe pikëpamje rreth përmasave të dukurisë së ekstremizmit të dhunshëm dhe përgjigjes institucionale që i është dhënë këtij fenomeni në Kosovë gjatë kësaj periudhe.

Këtij debati dua t’i kontribuoj me fakte që do të na ndihmojmë ta kemi më të qartë kontekstin dhe rrethanat nën të cilat kemi vepruar dhe që besoj na ndihmojnë të ndajmë faktet nga përfundimet në të cilat vijnë vrojtuesit e ndryshëm.

Ky kërcënim asnjëherë nuk është injoruar nga organet e rendit. Këtë e them me plot përgjegjësi duke konsideruar që në dhjetë vitet e fundit kam mbajtur pozita ekzekutive në Policinë e Kosovës dhe si kreu i shtetit, që drejtpërdrejt janë lidhur me përgjigjen që Kosova i ka dhënë këtij fenomeni.

Pa dashur të amnistoj klasën politike për shkaqet që kontribuuan në krijimin e hapësirës për këtë fenomen në Kosovë, dua t’iu përkujtoj që Kosova është përballur me sfidën e ekstremizmit të dhunshëm në të njëjtën kohë me shumë shtete evropiane. Por, ajo që e ka dalluar Kosovën – e cila megjithatë në 8 vjet shtetformimi ka ende institucione të brishta – nga të gjithë janë hapat e shpejtë dhe vendosmëria për të vepruar ndaj këtij kërcënimi.

Në verën e vitin 2014 nën koordinimin tim, në kohën kur Kosova po kalonte nëpër krizë të thellë politike, organet e rendit dhe të drejtësisë kanë ndërmarrë operacionin më të madh për arrestimin e rreth 60 qytetarëve në nivel Kosove për pjesëmarrje në lufta të huaja dhe bashkëngjitje organizatave terroriste. Këtij aksioni, me mbi 1000 policë, i ka paraprirë një punë e gjatë dhe shumë intensive e djemve dhe vajzave tona në uniformë që asnjëherë nuk e kanë nënçmuar këtë kërcënim. Mbi supet e tyre e kemi vënë përgjegjësinë për mbrojtjen e sigurisë nacionale dhe mbledhjen e mjaftueshme të dëshmive që këta pjesëtarë të grupeve terroriste të sillen para drejtësisë dhe të marrin dënimin e merituar për rrezikimin e mirëqenies së qytetarëve të Kosovës dhe aleatëve të tyre. Dua t’iu përkujtoj që këta mekanizma kanë punuar ditë e natë, përkundër kufizimeve të shumta të mandateve të tyre, që ta garantojnë sigurinë tonë kombëtare. Dhe e them me plot bindje që e kanë bërë një punë shembullore.

Si pjesë e këtij operacioni të koordinuar, ne i kemi dhënë goditje ekstremizmit të dhunshëm përmes mbylljes së xhamive ilegale dhe organizatave gjoja humanitare që kanë shërbyer si fronte për t’i indoktrinuar qytetarët e Kosovës dhe për t’i financuar kauzat terroriste.

– Kemi arrestuar individë që kanë mbjellë urrejtje dhe kanë nxitur të rinjtë tanë të marrin rrugë për Siri nën kauza të rrejshme.

– Kemi shtrirë bashkëpunimin në nivele të ndryshme me shtetet fqinje, bashkëpunim ky që ka eliminuar suksesshëm rekrutuesit kryesorë në Ballkan dhe ka zbuluar rrugët e financimit.

– E kemi forcuar bashkëpunimin tonë me aleatin tonë kryesor në këtë luftë dhe në shtetndërtim, Shtetet e Bashkuara të Amerikës. Zhvillimet në Kosovë dhe toleranca jonë zero ndaj këtij fenomeni dhe përkrahësve të tij ka qenë pikë permanente e takimeve të mija me nivelet më të larta në Shtetet e Bashkuara, në Bashkimin Evropian dhe shtetet e lindjes duke krijuar aleanca të vlefshme që na kanë ndihmuar që suksesshëm ta konfrontojmë këtë problem.

– Në takime brenda dhe jashtë i kam ngritur edhe shkaqet që i kanë kontribuar këtij fenomeni në Kosovë, duke mos përjashtuar përjashtimin shoqëror, korrupsionin dhe izolimin tonë si faktor kontribuues.

Puna jonë nuk ka përfunduar me kaq, sepse dimensioni i reagimit të autoriteteve rendit ndaj ekstremizmit fetar nuk mjafton. Edhe pse nuk jemi anëtar të OKB-së ne kemi marrë obligim ta harmonizojmë legjislacionin tonë me propozimet e rezolutës së Presidentit Obama në Këshillin e Sigurimit, duke u bërë ndër vendet e para që ka miratuar ligjin për dënim me burg deri 15 vjet për rekrutuesit dhe të rekrutuarit për kauza terroriste. Nga foltorja e Kuvendit të Kosovës kam bërë thirrje çdo herë që të jemi vigjilent ndaj këtij kërcënimi si institucione dhe si shoqëri.

Së fundi, në dhjetor 2015, zyra ime është angazhuar drejtpërdrejt në sigurimin e fondeve dhe ndihmës për ta parandaluar ekstremizmin e dhunshëm në nivelin lokal si pjesë e nismave të Fondit Global për Angazhim të Komunitetit dhe Rimëkëmbjes, dhe mekanizmi që do të kanalizojë këtë ndihmë duhet të jetësohet së shpejti nga Qeveria e Kosovës. Qasja në këtë fond do të krijojë partneritete të reja dhe mundësi për iniciativa të ndryshme që do të ndihmojnë fuqizimin e qytetarëve për të luajtur rol aktiv në parandalimin e ekstremizmit të dhunshëm.

Gjatë tërë kësaj përpjekje jo rrallë përkrahja përbrenda ka qenë e paktë dhe përqeshja e shpeshtë. Por, pas 3 viteve pune të palodhshme të mekanizmave tonë të sigurisë dhe vendosmërisë politike për mos të lejuar që Kosova të bëhet vatër e ekstremizmit të dhunshëm, Kosova duhet të ndihet mirë me përgjigjen që i ka dhënë ekstremizmit të dhunshëm. Në vitin 2013 dhe vitin 2014, gjithsej rreth 200 qytetarë kanë shkuar në drejtim të Sirisë. Në vitin 2015 numri i tyre nuk ka kaluar gishtat e dorës. Këtë vit, asnjë qytetar i Kosovës nuk u është bashkangjitur këtyre kauzave të rrejshme. Këto janë fakte të pandryshueshme. E tillë duhet të jetë edhe vendosmëria jonë politike dhe shoqërore që një sfidë të tillë të mos rikthehet më kurrë në mesin tonë”.