BE-ja shtyn votimin për ndalimin e makinave me djegie të brendshme

Vendet e Bashkimit Evropian shtynë votimin mbi ligjin historik të bllokimit që parashikon ndalimin e shitjeve të automjeteve të reja që emetojnë dyoksid karboni, pasi Gjermania vuri në diskutim mbështetjen e saj ndaj normave.

Nuk është njoftuar asnjë datë e re për votimin dhe një zëdhënës i Suedisë, që mban presidencën e radhës të BE-së, deklaroi se ambasadorët e vendeve të BE-së do t’i kthehen çështjes “në kohën e duhur”.

Pas disa muaj negociatash, vitin e kaluar, Parlamenti dhe Komisioni Evropian miratuan ligjin që parashikon se të gjitha makinat që do të shiten në BE, duke nisur nga viti 2035, do të jenë me zero emetime CO2, duke e bërë të pamundur shitjen e makinave me motor me djegie të brendshme, duke nisur nga ajo datë.

Ministri gjerman i Transportit, Volker Wissing theksoi se përdorimi i karburanteve sintetike duhet të mbetet i lejuar edhe pas përfundimit të afatit më 2035 dhe se mungon ende propozimi i premtuar nga KE-ja se si të arrihet ky objektiv.

“Ne duam lëvizshmëri neutrale nga pikëpamja klimatike” dhe për ta bërë këtë duhet të jemi të hapur ndaj të gjithë teknologjive të mundshme”, ka deklaruar Wissing.

Një seksion jo detyrues i ligjit të BE-së thotë se Komisioni do të paraqesë një propozim se si automjetet që funksionojnë me karburante me zero emetime CO2 të mund të shiten pas vitit 2035, nëse kjo përmbush qëllimet klimatike. Por Ministria gjermane e Transportit kërkon garanci më të qarta.

“Tranzicioni drejt automjeteve me emetim zero është absolutisht i nevojshëm për të arritur objektivat klimatike të vitit 2030 dhe 2050”, ka thënë një zëdhënës i BE-së.

Transporti është përgjegjës për thuajse një të katërtën e emetimeve të BE-së dhe ka kundërshtuar prirjen e përgjithshme të BE-së për të zvogëluar prodhimin e CO2 gjatë tre dekadave të fundit, duke kërcënuar të pengojë objektivat e bllokut për të ulur emetimet që ngrohin planetin. /Telegrafi/