BE-ja pret forumin e industrisë së mbrojtjes, temë kryesore Ukraina

Së fundmi, në Bruksel është mbajtur forumi i industrisë së mbrojtjes ku është diskutuar bashkëpunimi dhe rritja e prodhimit të municioneve për Kievin si përgjigje e agresionit të vazhdueshëm të Rusisë.

Bëhet e ditur se BE-ja ka pritur forumin e industrisë së mbrojtjes për të gjetur mënyra të reja për të furnizuar me armë Kievin.

Siç raportohet, pjesë e forumit ishin rreth 140 kompani nga 25 vende të ndryshme.

Ato kanë diskutuar se si kompanitë ukrainase mund të rrisin prodhimin e municioneve dhe të plotësojnë nevojat e vendit.

Kjo do të minimizonte kostot e transportit dhe do të lejonte që mjetet të prodhohen aty ku nevojiten, shkruan euronews, përcjell Telegrafi.

Lexo po ashtu Ministri italian i Mbrojtjes bën thirrje për armëpushim në Ukrainë, negociata paqeje me Rusinë

“Ne prodhojmë në Evropë, por duhet të jemi në gjendje të prodhojmë edhe në territorin ukrainas”, tha përfaqësuesi i lartë për Punët e Jashtme dhe Politikën e Sigurisë së BE-së, Josep Borrell.

Ndryshe, furnizimi i forcave ukrainase është dëshmuar të jetë detyrë jo e lehtë për aleatët e vendit.

Kjo pasi Moska vazhdimisht ka vënë në shënjestër kapacitetet industriale të Kievit si një nga objektivat kryesore të saj.

Gjatë forumit, është propozuar një plan prej 1.5 miliardë eurove për të përforcuar industrinë evropiane të mbrojtjes, duke synuar sigurinë e BE-së dhe aleatëve kryesore, përfshirë NATO-n dhe Ukrainën.

Kjo është hera e parë që BE-ja e pret forumin. Fillimisht ai është mbajtur në Ukrainë në vitin 2022, e ndjekur nga SHBA-ja vitin e ardhshëm. /Telegrafi/