BE-ja kundër Polonisë dhe Hungarisë për drithërat e Ukrainës

Komisioni Evropian ka hedhur poshtë vendimin e Polonisë dhe Hungarisë për ndalimin e importimet të grurit të Ukrainës.

Të dyja vendet thanë se masat ishin të nevojshme për të mbrojtur sektorët e tyre bujqësor nga importet e lira.

Lexo po ashtu ISW: Rusia do të rekrutojë ushtarë në rajonin e Luhanskut

Ndalimi vlen për drithërat, produktet e qumështit, sheqerin, frutat, perimet dhe mishin dhe do të jetë në fuqi deri në fund të qershorit.

Komisioni tha se nuk u takon shteteve anëtare individuale të bëjnë politikën tregtare, raporton bbc.

Ndërsa Komisioni ka thënë se lëvizjet e njëanshme nuk do të tolerohen, ai ende nuk ka specifikuar se çfarë masash do të marrë kundër Polonisë dhe Hungarisë.

“Në kohë të tilla sfiduese, është thelbësore që të koordinohen dhe të përafrohen të gjitha vendimet brenda BE-së”, tha zëdhënësi i saj në një deklaratë.

Shumica e grurit ukrainas eksportohet nëpërmjet Detit të Zi, por pushtimi i Rusisë vitin e kaluar ndërpreu rrugët e eksportit dhe rezultoi në sasi të mëdha të drithërave që përfundonin në Evropën Qendrore.

Një marrëveshje me Rusinë, e ndërmjetësuar nga OKB-ja dhe Turqia, i lejon Ukrainës të vazhdojë eksportet përmes detit – por Ukraina akuzon Rusinë për ngadalësimin e procesit me inspektime të stërzgjatura.

Lexo po ashtu Mizoritë e Putinit nuk ndalen as të dielën e Pashkëve Ortodokse, ushtria e tij bombardon kishën në Ukrainë

Polonia dhe Hungaria njoftuan masën të shtunën. Vendimi erdhi pas ankesave nga fermerët vendas, të cilët thanë se po dëmtoheshin nga drithërat më të lirë ukrainas që përmbytën tregjet e tyre.

Ndryshe, ministrat polak dhe ukrainas do të takohen të hënën për të diskutuar çështjen. /Telegrafi/