Ish-ylli i Chelseat dhe fituesi i Kupës së Botës realizon sfidën “Iceman Challenge” në temperaturat nën zero

Ish-ylli i Chelseat dhe fituesi i Kupës së Botës, Andre Schurrle, mori përsipër sfidën e “Iceman Challenge”, që do të thotë se ai u ngjit në një mal ndërsa i zhveshur sipër në temperatura nën zero.

Gjermani shijoi një karrierë vezulluese që e pa atë të fitonte Ligën Premier me Chelsean dhe të asistonte golin e fitores së Mario Gotze në finalen e Kupës së Botës së vitit 2014.

Megjithatë, ai doli në pension në fund të vitit 2020 në moshën 29-vjeçare, me ish-reprezentuesin gjerman që zbuloi se nuk donte më të përballej me vetminë dhe konkurrencën e pafund të natyrshme në futbollin e lartë.

Që nga pensionimi, Schurrle vendosi të largohej nga loja dhe të shijonte kohën me familjen e tij.

Por të dielën, ai ndau një postim në Instagram duke zbuluar se kishte ndërmarrë sfidën e Iceman Challenge, i frymëzuar nga atleti ekstrem holandez dhe folësi motivues Wim Hof.

Sfida konsistonte në atë që Schurrle duhej të ngjitej në një mal të mbuluar me borë pa veshur një bluzë, në atë që do të ishte një test i rëndë i forcës mendore dhe fizike të pjesëmarrësve.

Gjatë ekspeditës së tij gjermani kishte veshur vetëm pantallona të shkurtra, doreza dhe çizme hiking në temperatura nën zero.

Në postimin e tij, ish-sulmuesi gjerman tha: “Dita e tretë e Eksperiencës me Wim Hof ​​dhe ngjitja në majën me ekipin tonë të bukur!”.

“Gjëja më e vështirë mendore dhe fizike që kam bërë ndonjëherë! Minutat e fundit nuk ndjeja asgjë dhe duhej të gjeja diçka thellë brenda meje për të vazhduar”.

“Një përvojë që nuk do ta harroj kurrë. Minus 19 gradë celsius, erë 100 km/h në fytyrat tona, borë e dendur dhe shi. Ajo që mësova: trupi im dhe unë jemi më të fortë nga sa mendoja. Nëse vendos mendjen dhe shpirtin tim, mund të bëj gjithçka”, ka shkruar më tej ai.

Schurrle ishte qartësisht i kënaqur me përvojën që kishte marrë dhe mori shumë mbështetje për postin e tij. /Telegrafi/