Ish-ylli i Arsenalit është diagnostifikuar me sëmundjen e tuberkulozit

Sipas një raportimi nga gazeta holandeze De Telegraaf, lojtari i PSV-së i cili është diagnostikuar me tuberkulozë është Lucas Perez.

Sulmuesi spanjoll është futur në izolim dhe ka pak shanse të luajë për pjesën e mbetur të sezonit.

De Telegraaf ka raportuar se Lucas Perez i PSV-së po vuan nga tuberkuloza. Klubi kishte njoftuar për një rast të tillë të hënën, ndërsa gazeta zbuloi se lojtari i prekur është Perez.

“Një nga lojtarët e PSV-së është diagnostikuar me tuberkulozë aktive. Lojtari në fjalë ndihet sipas kushteve momentale. Edhe pse mundësia e infeksioneve të mëtejshme është e ulët, situata monitorohet nga afër sipas protokolleve standarde,” u tha në njoftimin e klubit, i cili nuk tregoi identitetin e lojtarit.

Më pas, De Telegraaf publikoi një raport ku konfirmohet se Lucas Perez është i prekur, duke thënë se ai nuk do të luajë në pjesën e mbetur të sezonit.

“Personi në fjalë do të duhet të qëndrojë në izolim për tre deri në katër javë dhe t’i nënshtrohet trajtimit me antibiotikë. Kjo ka një ndikim të madh në gjendjen fizike të lojtarit. Ai do të mungojë për një kohë të gjatë dhe është shumë e dyshimtë që të mund të luajë përsëri këtë sezon”.

PSV-ja ka marrë të gjitha masat e nevojshme, duke filluar nga hetimi i burimit të infeksionit, si dhe njoftimi i të gjithë palëve të përfshira.

“Për momentin, nuk ka asnjë tregues se njerëzit në afërsi të lojtarit të prekur nga kjo sëmundje janë infektuar. Klubi nuk është i autorizuar të japë më shumë detaje për identitetin e anëtarit të prekur,” thuhej tutje në njoftimin e klubit.

Tuberkuloza është një sëmundje infektive e shkaktuar nga një bakter që zakonisht prek mushkëritë dhe mund të përhapet përmes ajrit./Telegrafi/