Ish-e dashura Cassie Ventura është gati të dëshmojë kundër Diddyt

Cassie Ventura, ish e dashura e Diddyt, do të dëshmojë në gjyqin e ardhshëm kundër reperit.

Ventura deri më tani është renditur si “Viktima 1” në dokumentet e gjykatës, por planifikon të përdorë emrin e saj të parë kur të dëshmojë.

“Viktimat 2, 3 dhe 4 kanë kërkuar që të mos bëhet publik identiteti i tyre”, thuhet në dokumente.

Kujtojmë se në seancën e mëparshme gjykata zgjeroi aktakuzën ndaj reperit të famshëm.

Ndër të tjera, raportohet se Diddy ka paguar 100 mijë dollarë për një video ku ai godet ish të dashurën e tij Cassie Ventura.

Lexo po ashtu Të gjitha lajmet nga Cassie Ventura

Përveç kësaj, gjykata përfshiu aktakuzën e stilistes Bryana Bana Bongolan, e cila pretendon se reperi e vari atë mbi gardhin e apartamentit të katit të 17-të ku Ventura jetonte në atë kohë.

Ventura dhe Diddy filluan të takoheshin në vitin 2007. Ata e bënë publike romancën e tyre në vitin 2012 dhe u ndanë në vitin 2018.

Pesë vjet pas ndarjes, në nëntor 2023, Cassie ngriti një padi kundër Combs, duke thënë se ai ishte abuzues ndaj saj gjatë gjithë marrëdhënies së tyre 11-vjeçare.

Në padi thuhet gjithashtu se e ka dhunuar dhe në vitin 2016 ka pasur edhe një konflikt fizik.

Combs aktualisht përballet me më shumë se 40 akuza për sulme seksuale, shantazhe dhe trafikim njerëzor për qëllime shfrytëzimi seksual. Gjyqi i tij duhet të fillojë këtë maj në New York. /Telegrafi/