Inteligjenca Artificiale në dashuri – të rinjtë po e përdorin gjithnjë e më shumë

Gjenerata Z (18-26 vjeç) ka më shumë gjasa të përdorë Inteligjencën Artificiale në jetën e tyre të dashurisë – 15% të anketuarve përdorin Al për të planifikuar takime dhe 12% kërkojnë këshilla për marrëdhënie.

Pak më pak të hapur ndaj kësaj janë mijëvjeçarët (29-44 vjeç) – 9% e tyre përdorin AI për të planifikuar takime dhe 11% për këshilla dashurie.

Megjithatë, shumica e të rinjve ende nuk e lejojnë Al të marrë rolin e Cupidit.

Rreth 72% e anëtarëve të gjeneratës Z dhe 76% e mijëvjeçarëve nuk e kanë përdorur kurrë Al për qëllime romantike.

Arsyet kryesore, siç deklaruan ata, janë dyshimet për autenticitetin dhe lidhjen reale.

Ekspertja e marrëdhënieve Aly Bullock, e cila punon për aplikacionin Paired, shpjegon arsyet.

“Aplikacionet e takimeve janë rraskapitëse dhe pas pandemisë, njerëzit po kërkojnë gjithnjë e më shumë kontakte personale. AI vepron si një mjet tjetër që distancon marrëdhëniet nga lidhja e vërtetë njerëzore dhe shumë janë skeptikë për të.”

Si ndikon teknologjia në marrëdhëniet?

Të anketuarit zbuluan gjithashtu se çfarë problemesh kanë në marrëdhëniet kur bëhet fjalë për teknologjinë.

Problemi më i zakonshëm për gjeneratën Z dhe mijëvjeçarët është përdorimi i telefonave të tyre gjatë kohës së bashku – 57% e të rinjve dhe 68% e mijëvjeçarëve e citojnë atë si shpërqendrim. Kjo pasohet nga luajtja e lojërave dhe përgjigjja ndaj mesazheve të biznesit jashtë orarit të punës.

Edhe pse AI nuk pranohet ende gjerësisht në marrëdhëniet romantike, interesi po rritet. Pothuajse një e pesta e mijëvjeçarëve (19%) thonë se do të konsideronin përdorimin e Al për këshillim, terapi partneri ose ushtrime të udhëzuara për çifte në të ardhmen.

“Mbështetja e tepërt në Al mund të çojë në ulje të inteligjencës emocionale dhe zgjidhje më të dobët të konflikteve në marrëdhënie. Sfidat e marrëdhënieve janë zgjidhur gjithmonë me ndihmën e librave, miqve ose terapistëve – AI është vetëm një mjet tjetër”, tha Bullock.

“Nuk do të zëvendësojë lidhjen e vërtetë, por mund t’i ndihmojë çiftet të lundrojnë më mirë në marrëdhëniet moderne romantike. Në vend që të kemi frikë nga teknologjia e re, ne duhet të përqendrohemi në atë se si ajo mund të përmirësojë mënyrën e lidhjes. Ai tren tashmë po lëviz, duam apo jo.” /Telegrafi/