Instituti Ndërkombëtar i Shtypit dënon gjuhën e Sami Kurteshit ndaj mediave

Instituti Ndërkombëtar i Shtypit (IPI) i është bashkuar Asociacionit të Gazetarëve të Kosovës (AGK) në dënimin e gjuhës kërcënuese të përdorur nga Sami Kurteshi ndaj medieve.

AGK-ja ka mirëpritur mbështetjen e IPI-së, e cila gjithashtu i është bashkuar edhe Rrjetit të Grave Gazetare të Kosovës (RrGGK) në kundërshtimin e komenteve të papranueshme të anëtarit të KQZ-së dhe Lëvizjes Vetëvendosje.

Kurteshi i ka quajtur gazetarët “qen të mediave” dhe ka përdorur shprehjen “media kriminale të vrasësve me pagesë”.

Në një reagim në faqen e saj zyrtare në Facebook, IPI ka deklaruar se mbështet hapjen e një hetimi policor mbi këtë çështje dhe i ka bërë thirrje Kryeministrit Albin Kurti dhe partisë së tij në pushtet që të distancohen nga kjo retorikë e rrezikshme.

“Ne e mirëpresim hapjen e një hetimi policor dhe i bëjmë thirrje Kryeministrit Albin Kurti dhe partisë së tij në pushtet që ta dënojnë publikisht dhe të distancohen nga kjo retorikë e rrezikshme e Kurteshit. Partia e tij duhet t’i kërkojë Kurteshit që të kërkojë falje publike për komentet dhe të përmbahet nga bërja e komenteve të ngjashme dhe të rrezikshme në të ardhmen”, thuhet në deklaratën e IPI-së.