Institucionet e Pejës intensifikojnë bashkëpunimin kundër trafikimit me njerëz

Prokuroria Themelore në Pejë ka organizuar një takim koordinues në kuadër të Strategjisë Kombëtare kundër Trafikimit me Njerëz në Kosovë 2022-2026.

Takimi, i udhëhequr nga Kryeprokurorja e Prokurorisë Themelore të Pejës, Lumturije Vuçetaj, mblodhi përfaqësues kyç nga institucionet e drejtësisë dhe sigurisë, përfshirë Koordinatoren për veprat penale kundër trafikimit me qenie njerëzore, Valbona Haxhosaj, prokuroret e Departamentit për të Mitur, Sanije Seferi dhe Suada Hamza, si dhe përfaqësues nga Policia e Kosovës dhe Zyra për Mbrojtjen e Viktimave.

Në takim u theksua nevoja për bashkëpunim ndërinstitucional dhe krijimin e mekanizmave të efektshëm për luftimin dhe parandalimin e trafikimit me qenie njerëzore. Gjithashtu, u diskutua për trajtimin efikas të rasteve të identifikuara, duke siguruar që të gjitha institucionet e përfshira të përpilojnë raporte për Prokurorinë e Shtetit, të cilat do të shërbejnë për veprime ligjore të mëtejshme.

Në përfundim, pjesëmarrësit arritën në disa konkluzione të rëndësishme që do të ndihmojnë në forcimin e luftës kundër trafikimit me njerëz në nivel lokal dhe kombëtar./Telegrafi/