Inatet e djemve të Enver Hoxhës me Mehmet Shehun

Sokol Hoxha zbulon detaje për një lufte të fshehur mes djemve të Enver Hoxhës dhe Mehmet Shehut, duke dhene deshmi personale, e duke treguar se si djali i Mehmetit u be shefi i tij.

Në vijim të intervistës së dhënë në “Panorama”, Sokol Hoxha – i biri i Enver Hoxhës – thotë se “realisht nuk bëhej fjalë për dualizëm të Mehmetit ndaj Enverit, por familja e tij, Fiqereti e djemtë, apo grupi i shoqërimit, e ushtronin këtë në mënyrë të dukshme”.

“Për këtë kam dëshmi personale. Djali i madh i Mehmetit kishte mbaruar më përpara dhe punonte në të vetmen qendër elektronike në atë kohë, në Durrës, në uzinën e radiotelevizorëve. Me sa më kujtohet, në pozicion kyç të kryeinxhinierit. Unë mbarova më ‘74 dhe fillova punë në një grup të vogël elektronik prej katër vetash, bashkë me mua, në Institutin e Mekanikës. Shefi ynë ishte një nga të katërt, inxhinier shumë i zoti, që e zgjeroi repertorin studimor të qendrës drejt automatizimit të industrisë e bujqësisë. Pra, krahas Durrësit filloi të ndihej edhe Tirana nëpërmjet qendrës sonë. Nga mesi i vitit ’81, Ministria e Industrisë, nga e cila varej dhe Instituti i Mekanikës, na njofton se shefi i qendrës do të jetë djali i Mehmetit i transferuar nga Durrësi”, thotë ai.

Hoxha tregon se fillimisht e kishin propozuar të ishte shef i qendrës, gjë që s’mund ta pranonte kundrejt eksperiencës që kishte shefi aktual.

“Ndërsa Vladimiri, djali i madh i Mehmet Shehut, erdhi pikërisht në vendin ku isha unë, kur mund të shkonte kudo, sepse çdo institucion në Tiranë kishte nevojë për inxhinierë elektronikë. Babai nuk bëri asnjë koment, por unë e ndjeva që nuk i pëlqeu. Sepse edhe pyeti: ‘A u njoftua drejtori për këtë gjë’? Flitej për drejtorin e Institutit të Mekanikës. Unë i thashë: ‘Më duket se jo, se urdhri erdhi nga ministri i Industrisë’”, thotë Sokoli.

Ai tregon me tej se kur pas disa kohësh i tha Enverit se e kishin propozuar që të fillonte punë në Post-Telekom, ai u ndje shumë i gëzuar.

“Më tha: Shumë mirë, se është një sektor shumë i gëzueshëm i jetës së vendit. E ëma, Nexhmija nuk ka reaguar. Sinqerisht nuk kam bërë muhabet se derisa Enveri nuk e dha veten, natyrisht dhe Nexhmija nuk e jepte veten”, shton ai.