IHMK: Qytetarët të mos i ekspozohen diellit, pritet ulje e temperaturave

Instituti Hidrometorologik i Kosovës (IHMK) përmes një komunikate për media njofton se, masat e nxehta të ajrit të cilat kanë përfshirë territorin tonë dalëngadalë po tërhiqen, duke bërë që merkuri në termometër të shënojë rënie për 3 deri 4 gradë në vlerat e temperaturave maksimale, ndërsa minimalet gjatë natës parashihen të mbesin pothuajse konstante.

IHMK bën të ditur se “me kushte pothuaj të ngjashme parashihet edhe dita e parë e javës së ardhshme, mirëpo nga dita e martë sërish nxehtë e me vapë, me temperatura afërsisht të ngjashme me ditët e fundit”.

“Indeksi UV mbetet në vlerat e rrezikut dhe këshillat e IKSHP mbesin në fuqi që nga ora 9-17 mundësisht të mos jemi në kontakt të drejtpërdrejt me rrezet e diellit”, thotë IHMK.

Tutje, IHMK thekson se këto temperatura janë në dobi të kulturave bujqësore.

“Edhe pse këto temperatura të larta të pa regjistruara ndonjëherë në qershor, janë shumë në dobi të shumë kulturave bujqësore e në veçanti të kulturës së grurit, sepse tani vetëm se fillon faza e korrje shirjes të kësaj kulture me rëndësi jetësore”.

“Temperaturat minimale do të lëvizin ndërmjet 16-17 gradë Celsius, ndërsa maksimalet e ditës parashihen të lëvizin ndërmjet 31-33 gradë Celsius”

Gjithashtu, në njoftim thuhet se do të fryjë erë nga drejtimi i verilindjes e lehtë deri mesatare dhe mesatarisht e fortë në territore të izoluara. /Telegrafi/