Ibra thyen heshtjen, flet për coronavirusin dhe të ardhmen e tij

Zlatan Ibrahimovic është larguar nga Italia me familjen e tij dhe momentalisht po qëndron në kryeqytetin suedez Stockholm.

Sulmuesi suedez po qëndron i izoluar dhe ai ka bërë tani një intervistë për gazetën Svenska Dalgbadet sa i përket të ardhmes së tij te Milani.

38-vjeçari ka thënë sa është i lumtur që ka luajtur përsëri te Milani, pasi i kishte munguar pasioni i italianëve për futbollin.

“E ardhmja? Do të shohim, ende nuk e di se çfarë do të ndodhë, pasi çdo ditë po ndodh diçka e re”.

“Italia për mua është shtëpia ime e dytë dhe ka qenë e mrekullueshme të luaj përsëri në San Siro. Më ka munguar jashtëzakonisht shumë pasioni që italianët kanë për futbollin dhe klubet e tyre”, deklaroi Ibrahimovic, duke lënë të hapur mundësinë të tërhiqet, por edhe të vazhdoj edhe për një vit me Milanin.

Tutje Ibrahimovic ka folur edhe për pandeminë Covid-19, që ka paralizuar futbollin dhe tani thuajse asnjë kampionat në botë nuk është duke u zhvilluar.

Veterani suedez arriti që të largohej nga Italia për në vendlindje ku po qëndron i izoluar së bashku me familjen e tij.

“Është e dhimbshme që kampionatet e futbollit janë ndaluar, por që duhet t’i respektojmë rregullat dhe të kemi durim pasi edhe kjo do të kalojë. Duhet të shijojmë jetët tona dhe shëndeti është gjëja më e rëndësishme”, deklaroi Ibrahimovic.

“Kam një familje për të cilën duhet të kujdesëm dhe ajo është e lumtur këtu, kësisoj që edhe unë jam i lumtur”, përfundoi Ibra. /Telegrafi/