Hoti: Nëse nuk arrihet marrëveshje me Serbinë vazhdojmë si dy vende të pavarura, që nuk e njohin njëra-tjetrën

Kryeministri i vendit, Avdullah Hoti ka thënë se nëse nuk arrihet marrëveshje përfundimtare në mes të Kosovës dhe Serbisë, atëherë vendet do të vazhdojnë si dy shtete të pavarura fqinje që nuk e njohin njëra-tjerrën.

Hoti në konferencën për media me komisionerin e BE-së për Fqinjësi dhe Zgjerim, Oliver Verhelyi tha se ka konsensus të plotë shoqëror në Kosovë për procesin e dialogut dhe qeveria është e përkushtuar të shtyjë përpara këtë çështje.

“Kemi hyrë në proces të dialogut për marrëveshje paqe, marrëveshje përfundimtare që duhet të përmbyllet me normalizim të plotë të marrëdhënieve, kur arrihet ky normalizim i plotë, vetëm me njohje reciproke. Atë që kam thënë dhe po e them prapë, ne jemi të përkushtuar për dialog, 1 muaj, 2 muaj, 1 vjet, nëse e përmbyllim këtë marrëveshje do të ishte mirë për qytetarët tanë, do të ishte mirë për Serbinë për krejt regjionin, edhe për BE-në që të integrohet ky regjion përfundimisht në BE, por nëse nuk arrijmë marrëveshje përfundimtare nuk kemi çfarë të bëjmë, vazhdojmë si dy shtete të pavarura fqinje që nuk e njohin njëra tjetrën”, tha Hoti.

Ai ka thënë se ka tema të vështira në procesin e dialogut por që duhet gjetur forma për t’i tejkaluar ato drejt marrëveshjes përfundimtare.

Ndërkaq, Oliver Verhelyi pa dashur të flasë për çështjen e dialogut Kosovë-Serbi, ka thënë se këto negociata nuk janë të lehta.

“Nuk dua të deklarohem për këtë sepse kam diskutuar me kryeministrin Hoti dhe gjithashtu me presidentin Vuçiq. Shoh se ka përparim dhe angazhim, gjithashtu shoh se nuk janë të lehta negociatat që duhet t’i bëjnë, por është një momentum që ka filluar të zhvillohet. Z.Lajcak ka investuar shumë dhe gjithashtu partnerët amerikan janë të interesuar në këtë proces, kohët e fundit kemi parë marrëveshjen në Uashington, shumë elemente në Uashington do t’i gjeni gjithashtu në planin tonë ekonomik të investimeve, po shpresoj që mund të ia dalim në një të ardhme jo të largët”, tha ai.

Ndërsa për liberalizimin e vizave, komisioneri i BE-së përsëriti se Kosova i ka përmbushur kushtet por që duhet bindur vendet anëtare, që sipas tij, kjo nuk është e lehtë.

“Kushtet siç ka thënë Komisioni janë përmbushur, megjithatë ne duhet t’i bindim shtetet anëtare dhe bindja e shteteve anëtare nuk është një punë e lehtë, për t’i bindur shtetet anëtare kjo arrihet vetëm nëse dëshmojmë me përparim në terren në punën ditore dhe arritjen e rezultateve. Por kryeministri po e bën këtë, që të arrihet besimi që nuk do të ketë abuzime pas liberalizimit të vizave që të mos ketë kërkesa për azil, që mos të ketë krim të organizuar apo ndikim nga krimi i organizuar në shtetet anëtare dhe kjo është ajo çka po punojmë dhe na jepni kohë dhe hapësirë që të arrijmë këtë, dhe do ta arrijmë”, tha ai, raporton KP.

Komisioneri i Bashkimit Evropian për Fqinjësi dhe Zgjerim, Oliver Verhelyi pas takimit me kryeministrit Hoti, ka takuar kryetaren e Kuvendit, Vjosa Osmani dhe pastaj ka mbajtur një fjalim në Kuvendin e Kosovës.

Por, nuk pritet të takojë presidentin e Kosovës, Hashim Thaçi gjë për të cilën ai tha se nuk e ka të paraparë në agjendë.