Hoteli i parë dhe më i famshëm i bërë nga akulli: Një eksperiencë e paharrueshme pret mysafirët në dhoma

Një martesë në kishëz të akullit është një atraksion i vërtetë

Hoteli i bërë nga akulli në Suedi edhe këtë dimër u ka përgatitur një përvojë të paharrueshme vizitorëve të vet, ku kanë marrë pjesë shumë artistë nga vendet e gjithë botës.

Pamje të paharrueshme presin të mysafirët në dhomat e akullit dhe barin e akullit, por një martesë në një kishëz akulli pranë Qarkut të Arktikut është një atraksion i vërtetë.

Qyteza Jukkasjärvi, 200 km në veri të Qarkut të Arktikut, me pak më shumë se 500 banorë, ka qenë një destinacion i famshëm turistik për dekada, falë një hoteli atraktiv të bërë nga bora dhe akulli, me ujë nga lumi Torna aty pranë, transmeton Telegrafi.

Hoteli i akullit përbëhet nga një godinë që është e hapur gjatë gjithë vitit, Icehotel 365, dhe një pjesë sezonale, e cila hapet në dhjetor dhe zgjat deri në ditët e para të pranverës. Përveç ndërtesave të akullit, hoteli ka edhe një ndërtesë klasike, me ngrohje me dhoma dhe ambiente të tjera hoteliere, ndaj akomodimi në Icehotel kombinon qëndrimin në këto dy hapësira.

Icehotel 365 u hap në vitin 2016 dhe u projektua nga arkitekti suedez Hans Eek. Në një sipërfaqe prej 2100 metrash katrorë ndodhen 20 apartamente, një bar Ice dhe një galeri akulli. Duke marrë parasysh që është tërësisht prej akulli, ruan një temperaturë konstante prej -5 gradë Celsius, gjë që e ndihmojnë edhe panelet diellore.

Hoteli i akullit vizitohet çdo vit nga rreth 70,000 njerëz. Shumica prej tyre nuk e kanë kaluar kurrë natën në temperatura nën zero, apo edhe në një thes gjumi. Për ata që vendosin për këtë aventurë, hoteli ofron çanta të veçanta gjumi të përshtatshme deri në -25C, që është më se e mjaftueshme për një qëndrim të rehatshëm.

Në hotelin me akull, i cili funksionon vetëm gjatë dimrit, nuk ka dyer mes dhomave, ndaj në mëngjes stafi i hotelit hap perdet ndarëse dhe zgjon mysafirët me lëng të ngrohtë boronicë. Kur dalin nga hoteli i akullit, ose kur lëvizin në pjesën e ngrohtë, mysafirët marrin një diplomë me informacion mbi datën e qëndrimit të natës dhe temperaturat brenda dhe jashtë hotelit në atë kohë.

Për ata që vendosin të martohen në këtë vend të jashtëzakonshëm, është parashikuar një sallë akulli për ceremoninë, nga dhjetori deri në prill, kur akulli do të shkrihet. Ndryshe çdo vit, kjo sallë dizajnohet nga artistë të përzgjedhur nga vende të ndryshme të botës.

Kapaciteti i sallës së ceremonive është 35-40 të ftuar, dhe për qëndrimin dhe festën e tyre ka 35 suita akulli të punuara me dorë, si dhe një sallë kryesore spektakolare me llambadarë dhe kolona akulli.

Hoteli i akullit dhe kapela e akullit, që ekziston në këtë formë prej vetëm disa muajsh, garantojnë një atmosferë unike dhe foto të papërsëritshme për porsamartuar.

Për një qëndrim në hotel nevojitet një përgatitje e mirë, para së gjithash është e rëndësishme zgjedhja e veshjeve, ndaj hoteli këshillon që të jetë një gardërobë me shtresa, termike, funksionale, mundësisht prej leshi, me çizme, kapele dhe doreza të detyrueshme. Çelësi janë shtresat e holla që mundësojnë ajrim të mirë dhe ruajnë nxehtësinë e trupit, të bëra nga materiale që marrin frymë dhe parandalojnë djersitjen. Megjithëse temperatura e brendshme mbahet në -5C, temperatura e jashtme mund të bjerë në -40C, kështu që mysafirët do të marrin këshilla shtesë për veshjen dhe sjelljen nëse planifikojnë aktivitete në natyrë.

Ky qytet i vogël në veri të Suedisë mund të arrihet me aeroplan nga Stokholmi, fluturimi zgjat rreth 90 minuta, ose me tren për 12 orë. Paketa bazë e akomodimit në hotel, pa transport, përfshin dy net me mëngjes, një në dhomë të ftohtë dhe një në dhomë të ngrohtë, dhe çmimi fillon nga 430 euro për person.

Poashtu, mund të bëni vetëm për një turne ditor në hotel, skulptura akulli dhe një vizitë në Icebar, për të rritur, në sezonin e dimrit kushton rreth 30 euro.

/Telegrafi/