Holanda do të ndajë 6 miliardë euro shtesë për Ukrainën

Holanda ka ndarë 3.8 miliardë euro për Ukrainën dhe planifikon të sigurojë 6 miliardë euro shtesë.

Zona prioritare e ndihmës holandeze është energjia, deklaron ambasadori holandez në Ukrainë, Alle Dorhout.

Sipas tij, gjatë tre viteve të fundit, Holanda e ka mbështetur Ukrainën në mënyra të ndryshme – moralisht, me ndihmë humanitare, ndihmë për rindërtim dhe mbështetje ekonomike dhe ushtarake.

“Në të vërtetë, tashmë janë dhënë 3.8 miliardë euro, por janë planifikuar 6 miliardë euro më shumë. Kështu, Holanda ka ndarë mbi 10 miliardë euro ndihmë ushtarake, nga të cilat afro 4 miliardë euro tashmë janë dorëzuar”, tha ambasadori.

Në të njëjtën kohë, Dorhout theksoi se energjia është një nga prioritetet për holandezët për të ndihmuar Ukrainën.

“Ne kemi bërë tashmë shumë për të mbështetur vendin tuaj dhe ne jemi vazhdimisht në kërkim të mundësive të reja. Kolegët janë në kontakt të rregullt me palën ukrainase për të kuptuar se si ndryshe mund ta ndihmojmë Ukrainën të kalojë këtë dimër”, vuri në dukje diplomati.

Në muajin tetor u raportua se Holanda planifikon të ndajë më shumë se 6 miliardë euro ndihmë ushtarake për Ukrainën. Në atë kohë, ministri holandez i Mbrojtjes, Ruben Brekelmans deklaroi se mbështetja nuk do të reduktohet.

Për më tepër, në mesin e muajit tetor, u bë e ditur se Holanda do të ndajë 271 milionë euro shtesë për ndihmën ushtarake për Ukrainën. Këto mjete do të shpenzohen për predha artilerie.

Në fillim të muajit dhjetorit, Holanda vendosi të ndajë 22 milionë euro ndihmë për Ukrainën. Fondet do të drejtohen, në veçanti, për forcimin e sistemeve të mbrojtjes ajrore të Ukrainës. /Telegrafi/